प्लास्टिक बोतल बटुल्ने ‘प्यारो’ कुकुरलाई विष खुवाउने योजनाले सबै स्तब्ध

५ जेठ, काठमाडौं । दक्षिण चीनमा प्लास्टिकका बोतल सङ्कलन गरेर चर्चित बनेको एक फ्रेन्च बुलडग कुकुरलाई विष खुवाएर मार्ने योजना बनाएको आशङ्का गरिएको एक व्यक्तिलाई मालिकले प्रहरीलाई खबर गरेपछि पक्राउ गरिएको छ।

‘सियाओबाइ’ उपनाम दिइएको उक्त फ्रेन्च बुलडग कुकुर गत वर्ष सडकमा मिहिनेतका साथ प्लास्टिकका बोतलहरू सङ्कलन गर्ने बानीका कारण लाखौँ मानिसको मन जित्न सफल भएको थियो। उसका मालिक झाङले विगत पाँच वर्षमा सियाओबाइले सङ्कलन गरेका बोतलहरू बेचेर १ लाख युआन भन्दा बढी कमाएका छन्।

याङचेङ इभिनिङ न्युजका अनुसार, सियाओबाइको सोसल मिडिया अकाउन्ट @gouxiaobai मा ५ लाख फलोअर्स छन् र उसका केही भिडियोहरू १ करोड पटकभन्दा बढी हेरिएका छन्।

झाङले बताए अनुसार, मे ७ को दिउँसो एक “दयालु” इन्टरनेट प्रयोगकर्ताले उनलाई एउटा यस्तो ग्रुपको स्क्रिनसट पठाएका थिए, जहाँ मानिसहरू सियाओबाइलाई विष खुवाएर मार्ने योजना बनाइरहेका थिए। उक्त ग्रुपका सदस्यहरूले झाङको घरको ठेगाना शेयर गरेका थिए र क्षयरोगको उपचारमा प्रयोग हुने ‘आइसोनियाजिड’ नामक औषधिको प्रयोग गरेर कुकुरलाई मार्ने योजना बुनेका थिए। यो औषधिले जनावरहरूको स्नायु प्रणालीमा क्षति पुर्‍याउँछ र अन्त्यमा श्वासप्रश्वास प्रणाली विफल भएर जनावरको मृत्यु हुन्छ।

सोही दिनको साँझ, सेतो लुगा लगाएको र छाता बोकेको एक व्यक्ति झाङको घरबाहिर शङ्कास्पद रूपमा घुमिरहेको र फोटो खिचिरहेको देखिएको थियो। झाङले तत्कालै सो एनिमल एब्युज ग्रुपको च्याट रेकर्ड र शङ्कास्पद व्यक्तिको सिसिटिभी फुटेज प्रहरीलाई बुझाए। प्रहरीले झाङलाई दिएको जानकारी अनुसार, ती संदिग्ध व्यक्तिलाई मे ८ मा पक्राउ गरिएको छ र अहिले अनुसन्धान भइरहेको छ।

ती व्यक्ति पक्राउ पर्नुअघि झाङले सियाओबाइलाई विषालु खानेकुरा खुवाउन सक्ने डरले घरभित्रै थुनेर राख्नुपरेको थियो। झाङका अनुसार, त्यस अवधिमा बाहिर निस्कन नपाउँदा सियाओबाइ निकै निराश देखिएको थियो। पछि, फेरि बाहिर निस्कन पाएपछि सियाओबाइ पहिलेकै जस्तै फुर्तिलो भएर बोतलहरू सङ्कलन गर्न थालेको छ।

झाङले आफ्नो पछिल्लो भिडियो क्लिपमा भनेका छन्, “सियाओबाइ काममा फर्किएको छ र उसलाई निकै आत्मविश्वासी देखिन्छ।” उनले थपे, “जनावरहरूलाई दुर्व्यवहार गर्नेहरू समाजका फोहर हुन्। उनीहरूले मारेका जनावरहरूको बदला लिन म यो समूहविरुद्धको लडाइँमा प्रतिबद्ध छु।”

यो कथाले सोसल मिडियामा निकै ध्यान खिचेको छ। एक अनलाइन प्रयोगकर्ताले भनेका छन्, “म आशा गर्छु कि प्रहरीले विष खुवाउनेहरूलाई कडा सजाय दिनेछ। यो समूहको दुष्ट कामले उनीहरूलाई नै नराम्रो परिणाम दिनेछ।” अर्का एक व्यक्तिले भन्छन्, “कुकुर कति प्यारो र दयालु छ, उसले कसैलाई दुःख दिएको छैन। तर पनि उसलाई खराब मानिसहरूले निशाना बनाएका छन्। उनीहरूको सोच कति विकृत छ!”