कुमारी बैंकलाई ‘इन्फोसिस फिन्याकल इनोभेसन’मा प्लाटिनम अवार्ड

News Summary

Generated by OK AI. Editorially reviewed.

कुमारी बैंकले आफ्नो ग्राहक पहिचान तथा अनुपालन प्रक्रियाको पहलका लागि अन्तर्राष्ट्रिय स्तरको 'इन्फोसिस फिन्याकल इनोभेसन' अन्तर्गत प्लाटिनम अवार्ड प्राप्त गरेको छ ।
विश्वभरका बैंक तथा वित्तीय संस्थाहरूबाट परेका ५०० भन्दा बढी आवेदनहरूमध्ये उत्कृष्ट हुँदै कुमारी बैंकले यो पुरस्कार जितेको हो ।
पुरस्कृत प्रणालीले ग्राहक पहिचान प्रक्रियालाई छरितो र सुरक्षित बनाउनुका साथै नियामक मापदण्डहरूको पालना गर्न सहयोग पुर्‍याएको बैंकले जनाएको छ ।

१ असार, काठमाडौं । कुमारी बैंकले अन्तर्राष्ट्रिय स्तरको प्रतिष्ठित इन्फोसिस फिन्याकल इनोभेसन’मा व्यावसायिक मोडेल नवप्रवर्तनतर्फ उच्च तहको प्लाटिनम अवार्ड पाएको छ ।

बैंकले कार्यान्वयन गरेको ग्राहक पहिचान तथा अनुपालन प्रक्रिया (केवाईसी वर्कफ्लो कम्प्लायन्स) सम्बन्धी उल्लेखनीय पहलको लागि उक्त सम्मान प्रदान गरेको हो ।

इन्फोसिस फिन्याकलद्वारा प्रत्येक वर्ष आयोजना गरिने यो अवार्ड कार्यक्रम विश्वभरका बैंक तथा वित्तीय संस्थाहरूका उत्कृष्ट नवप्रवर्तन र रूपान्तरणका अभ्यासहरूको कदर गर्न सञ्चालन हुँदै आएको छ ।

यस वर्ष ९ विधामा ५०० भन्दा बढी आवेदन परेका थिए, जसबाट कुमारी बैंकले आफ्नो केवाईसी कार्यप्रवाह अनुपालन प्रणालीमार्फत उत्कृष्ट प्रदर्शन गर्दै प्लाटिनम अवार्डबाट सम्मान प्राप्त गरेको हो ।

उक्त प्रणालीले ग्राहक पहिचान प्रक्रियालाई छरितो, सुरक्षित र प्रभावकारी बनाउनुका साथै नियामकीय मापदण्डहरूको कडाइका साथ पालना गर्न सहयोग पुर्‍याएको छ । साथै, डिजिटल प्रविधिको उपयोगमार्फत सेवा प्रवाहलाई थप पारदर्शी र भरोसायोग्य बनाउन योगदान पुगेको बैंकले जनाएको छ ।

‘यस अन्तर्राष्ट्रिय सम्मानसँगै कुमारी बैंकले नवप्रवर्तनमार्फत सुरक्षित, भरपर्दो र ग्राहककेन्द्रित बैंकिङ सेवा प्रदान गर्ने आफ्नो प्रतिबद्धता सुदृढ बनाएको छ’ बैंकले एक विज्ञप्तिमा भनेको छ, ‘आगामी दिनहरूमा डिजिटल समाधान विस्तार गर्दै ग्राहकलाई अझ सहज, विश्वसनीय र उत्कृष्ट बैंकिङ अनुभव प्रदान गर्न प्रतिवद्ध छौं ।’