२०८३ असार ८ गते ८:४६ 
News Summary
Generated by OK AI. Editorially reviewed.- इजिप्टले न्यूजिल्यान्डलाई ३–१ ले पराजित गर्दै फिफा विश्वकप २०२६ अन्तर्गत समूह ‘जी’ को शीर्ष स्थानमा उक्लिएको छ ।
- खेलमा न्यूजिल्यान्डका फिन सम्र्यानले सुरुवाती गोल गरे पनि इजिप्टका मोस्तफा जिको, मोहम्मद सलाह र ट्रेजेग्वेटले गोल गर्दै जित दिलाए ।
- यो जितसँगै २ खेलबाट ४ अंक जोडेको इजिप्टको नकआउट चरणमा प्रवेश गर्ने सम्भावना बलियो बनेको छ ।
८ असार, काठमाडौं । न्यूजिल्यान्ड विरुद्ध पुनरागमन जित निकाल्दै इजिप्ट फिफा विश्वकपमा पहिलो जित हात पारेको छ ।
क्यानडाको बिसी प्लेस भ्यानकुभर स्टेडियममा सोमबार बिहान भएको खेलमा न्यूजिल्यान्डलाई ३–१ ले पराजित गर्दै इजिप्ट जी समूहको शीर्ष स्थानमा उक्लिएको छ र नकआउट चरण पुग्ने सम्भावना बलियो बनाएको छ ।
सन् १९३४ को दोस्रो संस्करणको विश्वकप खेलेको इजिप्टले चौथो सहभागितामा पहिलो जित निकालेको हो । यसअघि समूह जी को पहिलो खेलमा इजिप्टले बेल्जियमसँग बराबरी खेलेको थियो ।
इजिप्टको जितमा मोहम्मद सलाह, मोस्तफा जिको र ट्रेजेग्वेटले एकएक गोल गरे । खेलमा पहिलो अग्रता न्यूजिल्यान्डले लिएको थियो ।
खेलको १५औं मिनेटमा फिन सम्र्यानले गोल गर्दै टोलीलाई अग्रता दिलाएका थिए । तर, न्यूजिल्यान्डले अग्रता जोगाउन नसक्दा पराजित हुन पुग्यो । खेलमा ५८औं मिनेटमा जिकोले गोल गर्दै इजिप्टलाई बराबरीमा फर्काए ।
त्यसको ९ मिनेटपछि इजिप्टका कप्तान सलाहले गोल गर्दै टोलीलाई अग्रता दिलाए । ८२औं मिनेटमा ट्रेजेग्वेटले गोल गर्दै इजिप्टको अग्रताको दुरी बढाए । बल पोजिसनदेखि सर्टसम्ममा इजिप्ट हाबी बन्यो ।
जितसँगै इजिप्ट २ खेलबाट ४ अंक जोडेर समूह ‘जी’ को शीर्ष स्थानमा उक्लिएको छ । इजिप्टको नकआउट चरणमा प्रवेश गर्ने सम्भावना बलियो बनेको छ । इरान र बेल्जियमको समान २ अंक छ । न्यूजिल्यान्डको एक अंक छ ।
विश्वकप इतिहासमा इजिप्टको यो पहिलो जित हो । पहिलोपटक सन् १९३४ मा विश्वकप खेलेको इजिप्टले त्यसयता १९९० र २०१८ को विश्वकप खेलेको थियो । तर, कुनै पनि जित निकाल्न सकेको थिएन । यसपटक पहिलो खेलमा बराबरी खेलेको इजिप्टले दोस्रो खेलमा पुनरागमन जित निकालेको हो ।
प्रतिक्रिया 4