इन्जुरी समयको पेनाल्टीबाट एनएसएलमा वीरगञ्जको पहिलो जित

२०८० मंसिर २७ गते १९:१०

इन्जुरी समयको पेनाल्टीबाट एनएसएलमा वीरगञ्जको पहिलो जित

२७ मंसिर, काठमाडौं । नेपाल सुपर लिग एनएसएलको अंक तालिकामा पुछारमा रहेको वीरगञ्ज युनाइटेट स्पोर्टिङ इलामलाई हराउँदै आठौं स्थानमा उक्लिएको छ ।

दशरथ रंगशालामा भएको तनावपूर्ण खेलमा इलामले पहिलो अग्रता लिए पनि त्यसलाई जोगाउन सकेन र वीरगञ्जसँग इन्जुरी समयमा गोल खाँदै पराजित भयो ।

इन्जुरी समयमा इलामका आशिष गुरुङले सुनिल खड्कालाई बक्स भित्र फल गरेपछि वीरगञ्जले पेनाल्टी पाएको थियो । जसमा विलियम ओपोकुले कुनै गल्ती नगरी पेनाल्टीलाई गोलमा परिणत गरे ।

यसअघि १५ औं मिनेटमा वीरगञ्जका ३ जना डिफेन्डरबाट बिट भएको बललाई आशिष चापागाईँले बक्स भित्रबाटै गोल गरेर इलामलाई अग्रता दिलाएका थिए ।

तर त्यो अग्रता धेरै टिकेन । ३३ औं मिनेटमा सुशील लामाको बक्समा हानेको क्रसमा विशोन गुरुङले वान टचमा गोल गरे । इलामका किपर विकेश कुथुले बचाउने प्रयास सफल भएन ।

जितपछि ५ खेलबाट ५ अंक जोड्दै वीरगञ्ज आठौं स्थानमा उक्लेको छ । चितवन एफसीको समान ५ अंक भए पनि वीरगञ्ज हेड टु हेडमा पछि परेको हो ।

हारपछि ६ खेलबाट ४ अंक रहेको इलाम अन्तिम स्थानमा झरेको छ ।