गुन्डोगानले इन्जुरी टाइममा गोल गरेपछि बार्सिलोनाको पुनरागमन जित

२०८० पुष २० गते ९:१८

गुन्डोगानले इन्जुरी टाइममा गोल गरेपछि बार्सिलोनाको पुनरागमन जित

२० पुस, काठमाडौं । इल्के गुन्डोगानले इन्जुरी टाइममा पेनाल्टीबाट गोल गरेपछि बार्सिलोनाले स्पानिस ला लिगामा लस पलमसमाथि २-१ को पुनरागमन जित हात पारेको छ ।

घरेलु मैदानमा मुनिर अल हाड्डाईले १२औं मिनेटमा गोल गर्दै लस पलमसलाई सुरुवाती अग्रता दिलाएका थिए । मुनिर बार्सिलोनाकै पूर्व खेलाडी हुन् ।

५५औं मिनेटमा फेरान टोरेसले बार्सिलोनाका लागि बराबरी गोल फर्काए । उनले सर्जी रोबर्टोको असिस्टमा गोल गरे ।

इन्जुरी टाइममा खेलले नाटकीय मोड लियो । इल्के गुन्डोगानलाई धकेलेपछि लस पलमसका डाले सिन्कग्रेभनले रातो कार्ड सामना गर्दै मैदानबाट बाहिरिनुपर्‍यो भने बार्सिलोनाले पेनाल्टी पायो ।

त्यसैमा गुन्डोगानले गोल गर्दै बार्सिलोनालाई जित दिलाए ।

जितपछि बार्सिलोना १९ खेलबाट ४१ अंक जोडेर तेस्रो स्थानमा उक्लेको छ । लस पलमस १९ खेलबाट २५ अंकसहित दशौँ स्थानमै छ ।

अर्को खेलमा एथ्लेटिक विल्वाओले सेभियालाई २-० ले पराजित गरेको छ ।

जितपछि एथ्लेटिक विल्वाओ १९ खेलबाट ३८ अंक जोडेर चौथो स्थानमा उक्लेको छ । सेभिया १९ खेलबाट १६ अंकसहित १६औं स्थानमै छ ।