‘प्रिमियरमा हुने झूठो प्रशंसा’ तोड्न २०० बटुवालाई फिल्म देखाउँदै ‘के घर के डेरा’

News Summary

Generated by OK AI. Editorially reviewed.

फिल्म ‘के घर के डेरा : घर नम्बर २’ ले नेपाली फिल्म उद्योगमा नयाँ अभ्यास सुरु गरेको छ, जसमा सर्वसाधारणलाई प्रिमियरमा सहभागी गराइन्छ।
निर्देशक दीपेन्द्र के खनालले प्रिमियरमा अतिथिहरूको प्रतिक्रिया झूठा हुन सक्ने भन्दै, आम दर्शकबाट इमान्दार प्रतिक्रिया प्राप्त गर्न चाहन्छन्।
फिल्मका कलाकारहरूले काठमाडौंका विभिन्न स्थानमा पुगेर सर्वसाधारणलाई प्रिमियरको निम्तो दिँदै, यस नयाँ अभ्यासलाई प्रवर्द्धन गरिरहेका छन्।

काठमाडौं । फिल्म ‘के घर के डेरा : घर नम्बर २’ले नेपाली फिल्मको प्रिमियर समारोहमा सम्भवतः पहिलोपटक नयाँ अभ्यासको सुरुवात गर्दैछ । बुधबार बेलुका काठमाडौंको एक हलमा हुने प्रिमियर समारोहमा यो दृश्य देख्न पाइनेछ ।

फिल्मले झण्डै २०० हाराहारीमा सर्वसाधारण दर्शकलाई प्रिमियरमा सहभागी गराउने भएको छ । निर्देशक दीपेन्द्र के खनालले बाटो, मल र बजारमा ‘र्‍यान्डम्ली’ भेटिएका सर्वसाधारणलाई फिल्म हेर्न बोलाइएको बताए ।

‘अहिलेको प्रिमियरमा बोलाइएका अतिथिले गरेको प्रशंसा र रिभ्युलाई घरकै मान्छेले पनि पत्याउने अवस्था छैन । प्रिमियरमा हुने प्रशंसा धेरै झूठा हुन थाले’ निर्देशक खनालले अनलाइनखबरसँग भने, ‘बरु, आमसर्वसाधारणलाई प्रिमियरमा बोलाएर देखाउँदा इमान्दार प्रतिक्रिया आउँछ भन्ने हाम्रो आशा छ ।’

कलाकार केकी अधिकारी, खगेन्द्र लामिछाने र निश्चल बस्नेतले काठमाडौंका विभिन्न मल, बजार र चोक चोकमा पुगेर सर्वसाधारणलाई प्रिमियरको निम्तो दिइरहेका छन् । प्रिमियरमा उत्कृष्ट प्रतिक्रिया प्राप्त गरेको भनिएका फिल्मले दर्शकबाट आलोचना पाउन थालेको पृष्ठभूमिमा ‘के घर के डेरा’ले यो शैली सुरु गरेको हो ।

यो फिल्म शुक्रबारदेखि प्रदर्शन तयारीमा छ ।