सार्वजनिक पोखरीमा नुहाउन पसेका रविनलालको डुबेर मृत्यु

News Summary

Generated by OK AI. Editorially reviewed.

जनकपुरधाममा पोखरीमा डुबेर एक व्यक्तिको मृत्यु भएको छ।
सार्वजनिक पोखरीमा नुहाउने क्रममा रविनलाल कर्ण डुबेका थिए र उनको खोजी सशस्त्र प्रहरीको टोलीले रातिदेखि नै गरेको थियो।
घटना सम्बन्धी थप अनुसन्धान भइरहेको जिल्ला प्रहरी कार्यालय धनुषाले जनाएको छ।

३१ वैशाख, जनकपुरधाम । जनकपुरमा पोखरीमा डुबेर एक जनाको मृत्यु भएको छ। मृत्यु हुनेमा जनकपुरधाम उपमहानगरपालिका-४ का ४५ वर्षीय रविनलाल कर्ण छन् ।

मंगलबार सवा ४ बजेतिर जनकपुरधाम उपमहानगरपालिका-६ पेठिया बजार छेउमा रहेको सार्वजनिक पोखरीमा नुहाउन पसेका उनी डुबेर बेपत्ता भएका थिए ।

सशस्त्र प्रहरीको गोताखोर टोलीले रातिदेखि नै उनको खोजी गरेको थियो । तर, आज बुधबार मात्र उनको शव फेला परेको जिल्ला प्रहरी कार्यालय धनुषाका सूचना अधिकारी प्रहरी निरीक्षक सञ्जीवकुमार यादवले जानकारी दिए ।

उनको शव पोस्टमार्टमका लागि प्रादेशिक अस्पताल जनकपुरमा राखेर घटनाबारे थप अनुसन्धान भइरहेको जिल्ला प्रहरी कार्यालय धनुषाले जनाएको छ।