‘मिरमिरे’मा दयाहाङपछि प्रकाशको इन्ट्री

News Summary

Generated by OK AI. Editorially reviewed.

अभिनेता प्रकाश सपुतले फिल्म ‘मिरमिरे’ साइन गरेका छन्, जसमा दयाहाङ राई पनि मुख्य भूमिकामा छन्।
निर्देशक यम शेर्पाले कलाकार छनोट प्रक्रिया जारी रहेको र बजारले रुचाएका कलाकारलाई नै रोज्ने बताए।
फिल्मले ग्रामीण परिवेशको सामाजिक कथा प्रस्तुत गर्नेछ र २०८२ मा प्रदर्शन हुने योजना छ।

काठमाडौं । अभिनेता प्रकाश सपुतले फिल्म ‘मिरमिरे’ साइन् गरेका छन् । यसअघि यो फिल्मको शीर्ष भूमिकामा दयाहाङ राई अनुबन्धित भैसकेका छन् ।

होमप्रोडक्सनको ‘वसन्त’ रिलिजपछि सपुतले हालै ‘माइतीघर’मा काम गरेका थिए । ‘मिरमिरे’मा पहिलोपटक दयाहाङ र प्रकाशले सहकार्य गर्न लागेका हुन् ।

अन्य कलाकारबारे निर्माताले हालसम्म जानकारी दिएका छैनन् । ‘हामी कलाकारसँग सम्झौताकै क्रममा छौँ । केहीसँग कुरा भइरहेको छ’ निर्देशक यम शेर्पाले भने, ‘हामी अहिले बजारले रुचाएका र अभिनयमा पकड भएका कलाकारलाई नै लिएर काम गर्नेछौँ ।’

प्रकाश यो फिल्ममा अभिनेताका रूपमा मात्रै रहनेछन् वा सांगीतिक पाटोमा पनि जोडिनेछन् भन्ने तय छैन । फिल्म राम्रो बनाउन कुनै सम्झौता नगर्ने उनले दोहोर्‍याए । ‘मिरमिरे’ यमको दोस्रो निर्देशन हो ।

यसअघि ‘कार्साङ’ निर्देशक गरेका यमले ‘मिरमिरे’को कलाकार लाइनअप बलियो हुने बताए । अभिनेता प्रकाश सपुतले ‘मिरमिरे’मा जोडिन पाउँदा खुसी व्यक्त गरे ।

यार्सा फिल्म्सको प्रस्तुति रहने फिल्मले ग्रामीण परिवेशको सामाजिक कथा भन्ने निर्देशक यमले जानकारी दिए । निर्देशनसँगै कथावस्तु पनि यम स्वयमले लेखेका हुन् ।

निमु शेर्पा, छोङ्बा लामा शेर्पा र आङ्छिरिङ शेर्पा निर्माता रहेको फिल्मको सह-निर्मातामा गोविन्द बोहरा र ईश्वर श्रेष्ठ छन् । कार्यकारी निर्मातामा वितरक रोहित कट्टेल छन् ।

‘मिरमिरे’लाई २०८२ मा प्रदर्शन तयारी छ ।