‘कमेडी दरबार’ले थाल्यो पर्वतबाट फिल्म ’ककाकिकी’ छायांकन

News Summary

Generated by OK AI. Editorially reviewed.

टिभी शो ‘कमेडी दरबार’ले निर्माण गर्न लागेको फिल्म ‘ककाकिकी’को छायांकन पर्वतको भूकदेउरालीबाट सुरु भएको छ।
फिल्ममा तृप्ती नाडकर, रेखा थापा, दीया मास्के, सुभास गजुरेल, महेश त्रिपाठी र सुवर्ण थापा कलाकार छन्।
निर्देशक बिक्की अग्रवाल र श्रद्धा प्रसाईंले निर्देशन गर्ने फिल्मको छायांकन तीन साता पर्वत र त्यसपछि काठमाडौंमा हुनेछ।

काठमाडौँ । टिभी शो ‘कमेडी दरबार’ले निर्माण गर्न लागेको फिल्म ‘ककाकिकी’को छायांकन सुरु भएको छ ।

बिहीवार शुभमुहूर्त गर्दै ३५ दिने तालिकासहित निर्माताले पर्वतको भूकदेउरालीबाट छायांकन थालेका हुन् । ३ साता पर्वतमा गाउँको परिवेशका दृश्य छायांकन हुनेछ ।

त्यसपछि काठमाडौंमा छायांकन गरिने निर्देशक बिक्की अग्रवालले जानकारी दिए । अभिनेत्री तृप्ती नाडकर, रेखा थापा, दीया मास्के, सुभास गजुरेल, महेश त्रिपाठी, सुवर्ण थापा लगायतका कलाकार अहिले छायांकनस्थलमा छन् ।

अभिनेत्री गौरी मल्ल केही दिनमा पुग्ने फिल्मकी सह-निर्देशक श्रद्धा प्रसाईंले जानकारी दिइन् ।

फिल्मलाई चर्चित कमेडी टिभी शो ’कमेडी दरबार’ टिमले निर्माण गर्न लागेको हो । शोका निर्देशकद्धय बिक्की र श्रद्धाले नै फिल्मलाई निर्देशन गर्दैछन् भने पटकथा लेखक पनि बिक्कीसँगै बिकास अर्याल र सरोज भण्डारी हुन् ।

छायांकारमा सुदीप बराल छन् । गत साउनको दोस्रो हप्तामा फिल्मको एक पोस्टर सार्वजनिक गर्दै औपचारिक घोषणा गरिएको थियो ।

पोस्टरमा रेखा, गौरी, तृप्ती र अभिनेता महेश त्रिपाठीलाई अनौठो अवतारमा चित्रण गरिएको थियो । जुन पोस्टरका कारण पनि फिल्मको कथा रहस्यमय रहेको बुझन् सकिन्छ ।