८ मिनेटमा चोरियो १४ अर्बको गहना, कमजोर पासवर्ड मुख्य कारण

विश्वको सर्वाधिक लोकप्रिय संग्रहालय मध्येको एक फ्रान्सको लुभ्र संग्रहालयमा गत अक्टोबर १९ मा दिनदहाडै भएको अर्बौंको बहुमूल्य गहना चोरी काण्डमा नयाँ खुलासा भएको छ ।

उक्त नयाँ खुलासासँगै म्युजियमको सुरक्षामाथि प्रश्न उठेको छ ।

अनुसन्धानका क्रममा लुभ्र म्युजियममा साइबर सुरक्षा तथा मर्मतसम्भारमा समस्या रहेको पाइएको छ ।

फ्रान्स पब्लिकेसन लिब्रेसनको रिपोर्ट अनुसार दशकौंदेखि चलिआएको उक्त समस्या धेरैपटक सार्वजनिक भएको थियो । तर कहिल्यैपनि त्यसलाई पूर्णरुपमा समाधान गर्न सकिएको थिएन ।

समाचार अनुसार उक्त सुरक्षा जोखिमको बारेमा पहिलो चेतावनी सन् २०१४ मा सार्वजनिक भएको थियो ।

फ्रान्सको राष्ट्रिय एजेन्सी एएनएसएसआईले संग्रहालयको सूचना प्रविधि प्रणालीको अडिट गरेको थियो। त्यसमा सो संग्राहलयको सुरक्षा नेटवर्कको परीक्षण गरिएको थियो जुन अलार्म, भिडियो निगरानी तथा नियन्त्रित पहुँचसँग सम्बन्धित छ ।

एजेन्सी ले त्यसबारेमा २६ पेजको एक रिपोर्ट पेश गरेको थियो । उक्त रिपोर्ट अनुसार म्युजियमको कमजोर पासवर्ड तथा पूरानो प्रणालीका कारणले गर्दा केन्द्रीय नेटवर्कमा समेत सजिलै पहुँच प्राप्त गर्न सकिने थियो । अनुसन्धानका क्रममा केवल LOUVRE लेखेर भिडियो निगरानी सर्भरमा पहुँच प्राप्त गर्न सकिने खुलासा भयो ।

त्यसैगरी THALES लेख्दा एउटा अर्को सफ्टवेयर खुलेको थियो, जसलाई Thales ग्रुपले तयार गरेको थियो ।

त्योसँगै एजेन्सीले सेक्योरिटी नेटवर्कमा निकै धेरै समस्या रहेको र त्यसका कारणले ह्याकरहरूले सजिलैसँग आन्तरिक प्रणालीमा पहुँच प्राप्त गर्नसक्ने तथा ब्याज एक्सेस र भिडियो फीड परिवर्तन गर्नसक्ने भन्दै चेतावनी जारी गरेको थियो ।

एजेन्सीले म्युजियमलाई पासवर्ड बलियो पार्न र सिस्टम अपग्रेड गर्न सल्लाह दिएको भएपनि लुभ्र म्युजियमले सार्वजनिक रूपमा त्यसको पालनाका बारेमा कहिल्यैपनि केही जानकारी गराएन ।

त्यसैगरी सन् २०१७ मा भएको अर्को प्राविधिक अडिटमा पनि म्युजियमको प्राविधिक सुरक्षा प्रणालीमा त्यस्तै समस्या रहेको पत्ता लागेको थियो ।

गत अक्टोबर १९ मा लुभ्रमा भएको उक्त चोरी केवल ८ मिनेटभित्रैमा गरिएको थियो । चारजना चोरहरू मिलेर ८ करोड ८० लाख युरो अर्थात् करीब साढे १४ अर्ब रुपैयाँ बराबरको गहना चोरेका थिए । चोरहरूले उक्त घटना फिल्मी शैलीमा घटाएका थिए ।

चोरहरू बास्केट लिफ्ट लिएर म्यूजियमको पर्खालमा चढे, झ्याल फोडे र डिस्प्लेको बाहिरी खोल फोडेर गहना लिएर फरार भए ।

उक्त घटनामा अहिलेपनि जाँच चलिरहेको छ र केही मानिसहरूले पक्राउ गरिएको बताइएको छ । -एजेन्सी