पार्टीमा बिग्रह गराएर कसैको हित हुँदैन : डा.नारायण खड्का

३ मंसिर, काठमाडौं । नेपाली कांग्रेसमा महाधिवेशनको विषयमा विवाद चर्किरहेका बेला नेता डा. नारायण खड्काले पार्टीलाई सहमतिका साथ अगाडि बढाउनुपर्ने बताएका छन् ।

महाधिवेशनको विषयमा देखिएको विवादले पार्टीमा विभाजन ल्याउन सक्ने खतरा औंल्याउँदै उनले पार्टीलाई सहमतिका साथ अगाडि बढाउनुपर्ने बताएका हुन् ।

‘पार्टीलाई सहमतिका साथ हामीले अगाडि बढाउनु पर्छ । पार्टीमा विभाजन, विग्रह गराएर कसैको पनि हितमा छैन, ‘नेता खड्काले अनलाइनखबरसँग कुरा गर्दै भने, ‘नभए हामी हिँडेछौँ भनेर कसैको पनि भलो छैन । यसले कसैको भलो गर्दैन, लोकतन्त्रको भलो गर्दैन, देशको भलो गर्दैन ।’

पार्टीमा एकता नभएसम्म जो कोही नेतृत्वमा आए पनि केही नहुने उनको बुझाइ छ । पार्टीलाई विखण्डनतर्फ लगिएर ठूलो क्षति पुग्ने नेता खड्काले बताए ।

‘पार्टीमा एकता नभए जो–कोही नेतृत्वमा आएर पनि हुने वाला केही पनि छैन । पार्टीलाई बिखण्डन गरेर मुलुकलाई झन् ठूलो क्षति हुन्छ’, उनले भने, ‘विखण्डनतिर लाग्ने मान्छेहरूलाई पनि जनताले सकारात्मक रूपमा नहेर्न सक्छन् ।’

मुलुक अहिले अत्यन्त संकटमा रहेका भन्दै केन्द्रीय सदस्य खड्काले दलहरू निर्वाचनमा नगए झन् ठूलो संकट आउने पनि बताए । ‘फेरी अहिले क्रिटिकल आवर छ, अहिले देश अत्यन्त संकटमा छ,’ उनले भने, ‘निर्वाचन भएन भने अर्को ठूलो संकट छ, यसलाई मध्यनजर गरेर हामी जानुपर्छ ।’

विशेष महाधिवेशनका लागि हस्ताक्षर गरेका झण्डै ५४ प्रतिशत महाधिवेशन प्रतिनिधिहरूको भावनालाई सम्मान गर्नै पर्ने खड्काले बताए । ‘अब महाधिवेशनको कुरा आएको छ । पार्टीमा छलफल भएरहेको छ,’ उनले भने, ‘गत महाधिवेशनका २४ सय ८८ प्रतिनिधिले हस्ताक्षर गरेको कुरालाई पनि हामीले सम्मान गर्नुपर्छ ।’

हस्ताक्षरकर्ताको प्रतिनिधित्व गरेरै महामन्त्री गनगकुमार थापाले केन्द्रीय समिति बैठकमा कार्यतालिका पेश गरेको हुन सक्ने भन्दै उनले उक्त कार्यतालिका पारित गरेर महाधिवेशनमा जान सकिने पनि बताए ।

‘सिग्नेचर गरेकाहरूको प्रतिनिधित्व गरेरै होला महामन्त्रीको त्यो कार्यतालिका आएको, त्यसलाई पारित गरेर जाऊँ,’ खड्काले भने, ‘अनि त्यसपछि साथीहरू पनि तल ग्राउन्ड लेभलमा सक्रिय हुन्छन् । क्रियाशील बढाउन लाग्छन् । पार्टी अलिकति चलायमान पनि हुन्छ । त्यसरी अगाडि बढ्न सकिन्छ ।’