बालेनको गीतले तोड्ला प्रकाश सपुतको रेकर्ड ?

News Summary

Generated by OK AI. Editorially reviewed.

बालेनको नयाँ गीत ‘जय महाकाली’ले २४ घण्टामा ३७ लाख ४३ हजार ८१७ पटक हेरिएर युट्युबमा सर्वाधिक भ्यूजको नेपाली गीत बन्यो।
बालेनको यो गीत छिटो ५० लाख भ्यूज पाउने पहिलो नेपाली गीतमध्ये एक बनेको छ ।

काठमाडौं । बालेनको नयाँ गीत ‘जय महाकाली’ ले यतिबेला युट्युबमा धमाका मच्चाइरहेको छ । रिलिजको केही घण्टा र दिनमै यसले केही रेकर्ड रचेको छ ।

पहिलो- यो गीत २४ घण्टामा युट्युबमा सर्वाधिक पटक हेरिने नेपाली गीत बन्यो । २४ घण्टाभित्रै यसलाई ३७ लाख ४३ हजार ८१७ पटक हेरिएको छ । यसले दुर्गेश थापाको २४ घण्टामा १६ लाख ३६ हजार भ्यूजको रेकर्ड तोडेको थियो ।

बालेनको यो गीत छिटो ५० लाख भ्यूज पाउने पहिलो नेपाली गीतमध्ये एक बनेको छ । ३ दिनमै यसले उक्त भ्यूज पायो ।

अब, यो गीतसामु सबैभन्दा छिटो १ करोड भ्यूज पाउने कीर्तिमान बनाउनुपर्नेछ । यसका लागि उसले प्रकाश सपुतको नाममा रहेको रेकर्डलाई उछिन्नुपर्नेछ ।

सपुतको गीत ‘सकम्बरी’ ले युट्युबमा ७ दिनमै १ करोड भ्यूजको रेकर्ड राखेको थियो । रिलिजको बेला निकै विवादित बनेको यो गीतको भ्यूज रफ्तार आक्रामक देखिन्थ्यो ।

यतिबेला इन्टरनेटमा पनि बालेनको क्रेज उत्तिकै छ । यस्तोमा, के अब बालेनको गीतले सपुतको उक्त गीतको रेकर्डलाई उछिन्ला ? यो चुनौतीपूर्ण देखिन्छ । यद्यपि, यसका लागि केही दिन प्रतीक्षा गर्नुपर्नेछ । प्रधानमन्त्रीको सपथ लिनुअघि बालेनले आफ्नो युट्युब च्यानलबाट गीत ल्याएका थिए ।