२०८३ असोज ४ गते ७:३० 
News Summary
Generated by OK AI. Editorially reviewed.- राफिन्हाको ह्याट्रिकमा बार्सिलोनाले सेभियालाई ३–१ ले हराउँदै ला लिगामा शीर्षस्थानको अग्रता ६ अंकमा पुर्याएको छ।
- राफिन्हाले लगातार दोस्रो खेलमा ह्याट्रिक गर्दै यस सिजन सबै प्रतियोगितामा १४ गोल र ला लिगामा ९ गोल पुर्याएका छन्।
- बार्सिलोनाले लगातार सातौं ला लिगा जित निकाल्दै ७ खेलबाट २१ अंक जोडेको छ।
४ असोज, काठमाडौं । कप्तान राफिन्हाले लगातार दोस्रो खेलमा ह्याट्रिक गरेपछि बार्सिलोनाले ला लिगामा सेभियालाई ३–१ ले पराजित गर्दै शीर्षस्थानमा आफ्नो अग्रता थप फराकिलो बनाएको छ ।
रामोन सान्चेज पिजुआनमा भएको खेलमा घरेलु टोली सेभियाले १९औं मिनेटमा युसुफ फोफानाको गोलबाट अग्रता लिए पनि बार्सिलोनाले त्यसको तीन मिनेटमै जवाफ फर्कायो । राफिन्हाले बक्सभित्रबाट उत्कृष्ट फिनिस गर्दै खेल १–१ को बराबरीमा ल्याए ।
दोस्रो हाफमा लामिन यमालको दुई असिस्टमा राफिन्हाले थप दुई गोल गर्दै ह्याट्रिक पूरा गरे । उनले ५२औं मिनेटमा हेडरमार्फत दोस्रो तथा ६९औं मिनेटमा यमालको सुन्दर थ्रु पासलाई चिप गर्दै तेस्रो गोल गरे ।
राफिन्हाले यसअघि रेसिङ सान्टान्डरविरुद्धको ७–२ को जितमा पनि ह्याट्रिक गरेका थिए । यससँगै ब्राजिली विंगरले यस सिजन सबै प्रतियोगितामा १४ गोल तथा ला लिगामा मात्रै ९ गोल पुर्याएका छन् ।
यो जितसँगै बार्सिलोनाले लगातार सातौं ला लिगा जित दर्ता गर्दै ७ खेलबाट २१ अंक जोडेको छ । हान्सी फ्लिकको टोली दोस्रो स्थानको रियल म्याड्रिड र तेस्रो स्थानको रियल बेटिसभन्दा ६ अंकले अगाडि रहेको छ, यद्यपि दुवै टोलीले एक खेल कम खेलेका छन् ।
प्रतिक्रिया 4