‘देशकै पहिलो बहुभाषिक विद्यालय राजनीति र उपेक्षाको मारमा पर्‍यो’

१३ असोज, काठमाडौं । राष्ट्रिय स्वतन्त्र पार्टी (रास्वपा) का सचेतक प्रकाशचन्द्र परियारले सुनसरीको इटहरी उपमहानगरपालिका-२० तरहरास्थित ‘श्री बाल बहुभाषीय आधारभूत विद्यालय’ को दयनीय अवस्थाबारे प्रतिनिधिसभाको ध्यानआकर्षित गरेका छन् ।

मंगलबार बसेको प्रतिनिधिसभा बैठकको शून्य समयमा बोल्दै सांसद परियारले देशकै पहिलो ऐतिहासिक बहुभाषिक विद्यालय अहिले स्थानीय सरकारको उपेक्षा, आन्तरिक अव्यवस्था र दलीय राजनीतिको शिकार बनेको बताए ।

वि.सं. २०५१ सालमा तत्कालीन प्रधानमन्त्री स्वर्गीय मनमोहन अधिकारीबाट उद्घाटन भएको उक्त विद्यालय नेपालका सबै जातजातिको भाषा र संस्कृति संरक्षण गर्ने ऐतिहासिक धरोहर भए पनि पछिल्लो समय भौतिक तथा व्यवस्थापकीय संकटबाट गुज्रिहेको परियारको भनाइ थियो।

सदनमा बोल्दै सचेतक परियारले नर्सरीदेखि कक्षा ८ सम्म सञ्चालित विद्यालयमा हाल ५५ जना बालबालिका मात्र अध्ययनरत रहेको जानकारी गराए ।

५५ जना विद्यार्थीका लागि ३ जना स्थायी, ३ जना राहत, २ जना अनुदान, २ जना निजी स्रोतका शिक्षक र १ जना कर्मचारी गरी ११ जनाको दरबन्दी र जनशक्ति कायम रहे पनि पठनपाठन भने गम्भीर रूपमा प्रभावित भइरहेको उनले बताए ।

विद्यार्थी संख्याको तुलनामा पर्याप्त जनशक्ति हुँदाहुँदै पनि आन्तरिक व्यवस्थापकीय कमजोरी र शिक्षकहरूको लापरबाहीका कारण शैक्षिक गुणस्तर खस्कँदै गएको तर्फ उनले औंल्याए ।

विद्यालयको भौतिक पूर्वाधारको अवस्था अत्यन्तै नाजुक रहेको उल्लेख गर्दै सांसद परियारले विद्यालय प्रवेश गर्ने मुख्य बाटो हिलाम्मे रहेको, बालबालिकाका लागि खेलमैदानको अभाव भएको र भवनहरू जीर्ण बनेको चित्र सदनसमक्ष राख्नुभयो। स्थानीय सरकारका रूपमा रहेको इटहरी उपमहानगरपालिकाबाट विद्यालयको संरक्षण र स्तरोन्नतिका लागि आवश्यक सहयोग प्राप्त हुन नसकेको बताए ।

भाषा र संस्कृतिको नमुना केन्द्र बन्नुपर्ने विद्यालयलाई पछिल्लो समय राजनीतिक दलहरूको क्रिडास्थल बनाइएको भन्दै उनले चिन्ता व्यक्त गर्नुभयो। विद्यालयलाई पूर्ण रूपमा राजनीतिमुक्त बनाएर पठनपाठनमा अनुशासन कायम गराउनुपर्नेमा जोड दिए ।

सांसद परियारले ऐतिहासिक पहिचान बोकेको यस विद्यालयको स्तरोन्नति गर्न, आवश्यक भौतिक पूर्वाधार निर्माण गर्न र पठनपाठनको वातावरण सहज बनाउनका लागि स्थानीय सरकार तथा शिक्षा, विज्ञान तथा प्रविधि मन्त्रालयसँग अनुरोध गरे ।