१२ चैत, बेँसिशहर । लम्जुङको बेँसिशहर नगरपालिका ८ नारायणथानमा आगलागी हुँदा ४० लाख रुपैयाँ बढी क्षति भएको छ ।
गएराति १२ बजेतिर लागेको आगो दमकलको सहयोगमा एक घण्टापछि नियन्त्रणमा आएको थियो ।
आगलागीबाट उत्तर बहादुर परियारले सञ्चालन गरेको सर्टिङ-सुटिङ पसल र सो पसलसँगै रितेश थापाले सञ्चालन गरेको कम्प्युटर मर्मत गर्ने कोठामा क्षति भएको जिल्ला प्रहरी कार्यालय लम्जुङका डिएसपी यादव ढकालले जानकारी दिए ।
जस्ताको छानो भएको ब्लकबाट निर्मित दुईवटा सटरमा कपडा र कम्प्युटर मर्मत पसल सञ्चालन गरिएको थियो ।
परियारले सर्टिङ-सुटिङ पसल जल्दा ४० लाख क्षति भएको दाबी गरेका छन् । यसैगरी थापाले कम्प्युटर मर्मत कोठामा भएको आगलागी साढे पाँच लाख क्षति भएको दावी गरेका छन् । प्रहरीले भने क्षतिको एकीन विवरण आइनसकेको जनाएको छ ।
