२०७७ माघ १ गते ११:४३ 
१ माघ, काठमाडौं । डीएफबी पोकल (जर्मन कप)को साविक विजेता बार्यन म्युनिख दोस्रो चरणबाटै बाहिरिएको छ ।
बुधबार राति भएको खेलमा दोस्रो श्रेणीको क्लब होल्स्टिन किएलसँग पेनाल्टी सुटआउटमा ६-५ ले पराजित हुँदै बार्यन बाहिरिएको हो ।
निर्धारित र अतिरिक्त समयको खेल २-२ गोलको बराबरीमा सकिएपछि खेलको नतिजा पेनाल्टी सुटआउटबाट लिइएको हो ।
पेनाल्टी सुटआउटमा बार्यनका रोबर्ट लेवान्डोस्की, जोसुवा किमिच, थोमस मुलर, डेभिड अलवा र डुगलस कोस्टाले गोल गरे । तर, मार्क रोकाले गोल गर्न सकेनन् ।
किएलका लागि पेनाल्टी प्रहार गरेका सबै ६ खेलाडीले गोल गरे ।
बार्यनले खेलको १४औं मिनेटमा सर्ज नाब्रीको गोलबाट अग्रता बनाएको थियो । खेलको ३७औं मिनेटमा किएलका फिन बार्टेल्सले गोल गर्दै घरेलु टोलीलाई १-१ गोलको बराबरीमा ल्याए ।
खेलको ४८ औं मिनेटमा लरी सानेले गोल गर्दै बार्यनलाई २-१ को अग्रता दिलाए ।
तर, खेलको ९० औं मिनेटमा किएलका हउके वालले गोल गर्दै खेल २-२ को बराबरीमा ल्याएका थिए ।
निर्धारित समयको खेल बराबरी भएपछि थप गरिएको ३० मिनेटमा दुवै टोलीबाट गोल हुन सकेन ।
प्रतिक्रिया 4