१२ फागुन, काठमाडौं । मंगलबार दिउँसो जिल्ला प्रशासन कार्यालय काठमाडौंको प्राङ्गण एकाएक विद्यालयको मैदानजस्तै बन्यो । जिल्ला प्रशासन कार्यालय काठमाडौंमा मंगलबार विप्लव नेतृत्वको नेकपा माओवादी समर्थित अखिल क्रान्तिकारीले शान्ति सुरक्षाको माग गर्दै धर्ना दिने कार्यक्रम थियो ।

धर्नामा एकाएक विद्यालयकै पोशाकमा स-साना केटाकेटी र किशोर किशोरीहरु देखा परे । उनीहरु कलम र तारा अंकित रातो झण्डामा सजिएका थिए ।

केहीबेर जिल्ला प्रशासन कार्यालय विद्यालय प्राङगण भन्दा कम देखिएन । फरक यत्ति थियो कि उनीहरूले हातमा झण्डा तथा प्ले कार्ड बोकेर नारा लगाइरहेका थिए ।

हेर्नुस् भिडियो –

नारा लगाउँदा गलेका कतिपय केटाकेटीहरु संगठनले थमाएको झण्डा भुइँमा ओछ्याएर बसे ।

केही वालवालिकाले असफल गृह प्रशासन मूर्दावाद लेखिएको प्लेकार्ड बोकेका थिए भने केहीले किशोरीमाथि तेजाव खन्याउने घटनामा संलग्नमाथि कारवाहीको माग  गरिएका प्लेकार्ड बोकेका थिए ।

प्रशासन कार्यालय घेराऊको एजेन्डा तेजाव आक्रमणको विरोधमा थियो । एकातिर सामाजिक सुरक्षाको एजेन्डा र अर्कातिर राता क्रान्तिकारी झण्डाहरुको प्रयोगले केही फरक अनूभूति दिइरहेको प्रतीत हुन्थ्यो ।

प्रदर्शन हेर्दा यस्तो लाग्थ्यो उनीहरु ‘बाल माओवादी’हरु हुन् ।

भिडियो हेर्नुस् 

तर, महिला हिंसाको विरोधमा शहरका बालवालिका यसरी सडकमा आउँदा उनीहरुमा पनि राजनीति र सामाजिक समस्याप्रति चासो बढ्ने दाबी अखिलका नेताहरुको छ ।

बसन्तपुरमा हात बाँधेर प्रदर्शन

यसैवीच मंगलबार नै काठमाडौंको बसन्तपुरमा महिला अधिकारकर्मीहरुले तेजाव आक्रमणको घटनामा संलग्न दोषीमाथि कारवाहीको माग गर्दै डोरीले हात बाँधेर प्रदर्शन गरेका छन् । निर्णय फाउण्डेसनले बसन्तपुरमा सो प्रदर्शन गरेको हो ।

नोटः यसअघि समाचारमा विप्लव नेतृत्वको नेकपा माअाेवादी हुनुपर्नेमा एमाअाेवादी भएकाले सच्याइएको छ -सं.

तस्वीरः श्रीधर पौडेल/अनलाइनखबर