पर्यटन बाेर्डमा भ्रष्टाचार : को-को विरुद्ध भयो मुद्दा दायर ? कसले कति गरे भ्रष्टाचार ?

• विशेष अदालतका रजिष्ट्रार नातिबाबु लामिछाने । अख्तियारले पेश गरेको कागजात अध्ययन गर्दै ।

नविन अर्याल

२० चैत, काठमाडौं । नेपाल पर्यटन वोर्डको भ्रष्टाचारमा संलग्न २३ जना विरुद्ध अख्तियार दुरुपयोग अनुसन्धान आयोगले शुक्रबार विशेष अदालतमा मुद्दा दायर गरेको छ । उनीहरु विरुद्ध ६९ करोड रुपैयाँ विगोसहित मुद्दा दायर गरिएको हो ।

भ्रष्टाचार मुद्दा पर्नेमा दुई जना बहालवाला सचिव र एकजना पूर्वसचिव परेका छन् । बहालवाला सचिवमा वन मन्त्रालयका सचिव शरदचन्द्र पौडेल र नेेपाल कानुन आयोगका सचिव रञ्जनकृष्ण अर्याल रहेका छन् ।

पूर्वसचिवमा सँस्कृति पर्यटन तथा नागरिक उड्डयन मन्त्रालयका सुशील घिमिरे छन् । पौडेल र अर्याल वोर्ड सञ्चालक समितिका तत्कालिन सदस्य र घिमिरे तत्कालिन अध्यक्ष हुन् ।

अर्थ मन्त्रालयका सहसचिव डिल्लीप्रसाद शिवाकोटी र वनमन्त्रालयका सहसचिव मेघबहादुर पाण्डे विरुद्ध पनि भ्रष्टाचार मुद्दा दायर भएको छ ।

कस्ले कति खाए ?

सबैभन्दा धेरै भ्रष्टाचार गर्नेमा निलम्वित कायम मुकायम प्रमुख कार्यकारी अधिकृत सुवास निरौला रहेका छन् । अख्तियारले उनलार्इ ३३ करोड ७२ लाख ५५ हजार रुपैयाँ बिगो रकम दाबी गर्दै विशेष अदालतमा मुद्दा दायर गरेको छ ।

यसैगरी टुरिजम बोर्डका कर्पोरेट महाशाखाका निमित्त निर्देशक अनिलकुमार दासलार्इ १७ करोड ९४ लाख र निर्देशक हिक्मतसिंह ऐरलार्इ १६ करोड ५४ लाख ६३ हजार रुपैयाँ बिगो दाबी गर्दै मुद्दा दायर गरिएको छ । पर्यटन वोर्डका पूर्वप्रमुख कार्यकारी अधिकृत प्रचण्डमान श्रेष्ठले २८ लाख ८० हजार रुपैयाँ भ्रष्टाचार गरेको अख्तियारको ठहर छ ।

तत्कालनि बोर्ड अध्यक्ष सुशील घिमिरे, सदस्यद्वय मेघ बहादुर पाण्डे, पम्फादेवी धमला, हाल कायम सदस्यहरू रतिस चन्द्रलाल सुमन, रेवत बहादुर थापा, ध्रुवनारायण श्रेष्ठ र फुरगेल्जे शेर्पाले खर्च अनुमोदन गरी ११ करोड २८  लाख ९५ हजार ३६ रूपैयाँ हानिनोक्सानी पुराएको अख्तियारले जनाएको छ ।

त्यसैगरि, डिल्ली प्रसाद सापकोटा, टिकाराम सापकोटा, शरदचन्द्र पौडेल र रञ्जन कृष्ण अर्यालले नियमावली संसोधन गरेर बोर्डमा ६१ लाख २८ हजार २ सय ७७ रूपैयाँ हानिनोक्सानी पुर्‍याएको अख्तियारको दाबी छ ।

अरु को-को परे ?

मुद्दा दायर भएका अन्यमा पर्यटन वोर्डका निमित्त कार्यकारी अधिकृत नन्दिनी लाहे थापा, वोर्डका वरिष्ठ निर्देशक आदित्य बराल, निर्देशक काशीराज भण्डारी, निमित्त निर्देशक ध्रुव राई, वरिष्ठ प्रवन्धक दिवाकर राणा तथा प्रवन्धकद्वय लक्ष्मण गौतम, लिलाबहादुर बानिया र पर्यटन व्यवसायी महेन्द्र खनाल रहेका छन् ।

विशेष अदालतमा अख्तियारबाट वकिल सुदर्शन लामिछाने र अनुसन्धान अधिकृत एसएसपी यादवराज खनाल नेतृत्वको टोली पुगेर मुद्दा दायर गरेको हो ।

२९ कर्मचारीलार्इ साक्षीकाे रूपमा प्रस्तुत

बोर्डका अन्य २९ कर्मचारीलाई हस्ताक्षर गर्न दबाव दिएको दाबी गर्दै अख्तियारले आफ्ना अनुसन्धान अधिकृतलाई सहयोग पुराएकाले सजायको हकमा पूर्ण छुट गर्न अनुरोध गर्दै उनीहरूलार्इ सरकारी साक्षीको रुपमा प्रस्तुत गरेको छ ।

अख्तियारले साक्षीको रूपमा राखेकाहरुमा उदय भट्टराई, नविन पोख्रेल, शरद प्रधान, प्रदीप पौडेल, गोविन्दराज ओली, उज्जला दली, मणिराज लामिछाने, सुनिल शर्मा छन् ।

यसैगरी विमल शर्मा कँडेल, समिर बज्राचार्य, जितेन्द्र भट्टराई, नम्रता श्रेष्ठ, सूर्य थपलिया, सुमन घिमिरे, रोहिणी प्रसाद खनाल, दीपकराज जोशी, सुदन सुवेदी, सन्तोष विक्रम थापा, लेखनाथ भुसाल, श्रद्धा श्रेष्ठ, प्रदीप बस्नेत पनि भ्रष्टाचार आरोपीको सूचीमा छन् ।

अर्चना केसी, खड्कविक्रम शाह, खेमराज तिमल्सिना, जानकी प्रसाद उपाध्याय र मदनकुमार लामिछानेलाई पनि भ्रष्टाचार आरोप लागेको छ ।

बोर्डमा यसरी भयो भ्रष्टाचार/अनियमितता

पर्यटन बोर्डमा भएको भ्रष्टाचार तथा अनियमितता छानविन गर्न गठित समितिले करोडौं रकम हिनामिना भएको निष्कर्ष निकालेको थियो ।

सहसचिव पूर्णचन्द्र भट्टराईको समितिले बोर्डमा भ्रष्टाचार भएको ठहर गरेपछि व्यवस्थापिका संसदको लेखा समितिले कामु कार्यकारी प्रमुख सुवास निरौलालाई तत्काल निलम्बन गरि थप छानविन गरेर कारबाही गर्न सुझाव दिएको थियो । समितिले छानविनका क्रममा यसरी भ्रष्टाचार गरेको पाएको थियो ।

– नेशनल टुरिज्म फेयर कार्यक्रममा आर्थिक कार्यविधि पालना नभएको, रेडियो, टेलिभिजन मार्फत गर्नुपर्ने प्रचार-प्रसारको काम प्रतिस्पर्धा नगराई बोलपत्र छल्ने उद्देश्यले पटक-पटक भुक्तानी मेमोबाट सोझै खरीद गरेको र उक्त भुक्तानी एउटै व्यक्ति सम्वद्ध धेरै निकायलाई गरियो ।