२७ साउन, काठमाडौं । लिओनल मेस्सी र लुइस स्वरेजको गोलको मदतमा सामडोरियालाई पराजित गर्दै बार्सिलोनाले गाम्पर ट्रफी जितेको छ ।
बुधबार राति भएको खेलमा बार्सिलोनाले इटालियन क्लब सामडोरियालाई ३-२ गोल अन्तरले पराजित गरेको हो ।
बार्सिलोनाले १६ औं मिनेटमा लुइस स्वरेजको गोलबाट अग्रता लिएको थियो । पाँच मिनेट लगतै मेस्सीले अग्रता दोब्बर पारे । २३ औं मिनेटमा पाहुना टोलीले एक गोल फर्कायो ।
तर, ३४ औं मिनेटमा मेस्सीले व्यक्तिगत दोस्रो गोल गरेपछि पहिलो हाफमा बार्सिलोना ३-१ को अग्रता लिन सफल भयो ।
दोस्रो हाफको ७७ औं मिनेटमा सामडोरियाका बुडिमिरले गोल गरेपनि टोलीको हार टार्न सकेनन् ।
