२० मंसिर, काठमाडौं । मंसिर २१ गते हुने प्रतिनिधि सभा, प्रदेशको दोस्रो चरणको चुनावलाई स्वागत गर्दै सेयर बजार बन्द भएको छ ।
चुनावकै प्रभाव बजारमा दिर्घकालिन नहुने भएपनि केही दिनसम्म यसको प्रभाव भने देखिने गरेको छ । नियमित चुनावले देशमा स्थिर सरकार निर्माण गर्ने, लगानीको वातावरण बढ्ने लगायत सकारात्मक सन्देश दिन्छ । यस दिन बजार दोहोरो अंकले बढेर १५३६ विन्दुमा पुगेको छ । नेप्से ११.६७ अंकले बढेको हो ।
यस दिन नेप्से परिसूचक लगातार बढ्दो प्रवृत्तीमा देखियो । बुधवार बजारमा १ सय ६६ कम्पनीको सेयर किनबेच भएर ६७ करोड ९३ लाख रुपैयाँको कारोबार भएको हो ।
कारोबारमा आएका मध्ये व्यापारमुलक समूहको बाहेक सबै समूहगत परिसूचक बढेको छ । यसदिन १ सय १६ कम्पनीको सेयर मूल्य बढेर कारोबार भएको छ । ३१ कम्पनीको भने मूल्य घटेर सेयर कारोबार भएको छ ।