सुदूरपश्चिमको सांस्कृतिक नाच र कलामा रमाए पोखरेली

१८ चैत, पोखरा । सुदूरपश्चिमको संस्कृति पोखरेलीले धीत मर्ने गरी हेरेका छन् । शनिबार पोखरेलीले सुदूरपश्चिमको सांस्कृतिक नाच, कला साहित्य र संगीतको मजा लिएका हुन् ।

सुदूरपश्चिमको सांस्कृतिक विविधता बोकेको हुड्केली, भुओ, गमरा, चौधरीहरुको साखिया, छलिया, रानाथारुको होरी, समग्र सेती महाकाली अञ्चलको देउडालगायतका नृत्यमा पोखरेली रमाए । सुदूरपश्चिमका प्रसिद्ध धार्मिक शक्तिपीठहरु र पर्यटकिय महत्वका फोटोसमेत नियाल्ने मौका पाए ।

भाषा साहित्य एवं कला संस्कृतिलाई नेपाल र भारतका विभिन्न स्थानमा पुर्याउने अभियान लिएर सुदूरपश्चिमाञ्चल साहित्यिक समाज धनगढीको नेतृत्वमा सुदूरपश्चिमेली समूह पोखरा आइपुगेका थिए ।

‘साहित्यिक–सांस्कृतिक तथा पर्यटकीय देश दर्शन अभियान’ नाम दिएर मेची–महाकाली यात्रा थालेको समूहले पोखरामा सुदूरका साँस्कृतिक तथा जातीय नाचमात्रै देखाएन, साहित्यिक स्वाद पनि चखायो ।

भूगोलभन्दा माथि उठेर कला, साहित्य र संस्कृतिले जोड्ने काम गरेको कवि तीर्थ श्रेष्ठले बताए । ‘मान्छेलाई एउटा भूगोललेमात्रै बाँध्न र जोड्न सक्दैन । एक ठाउँ र अर्को ठाउँका मान्छेबीच संस्कृतिले जोडेको छ । भाषाले जोडेको छ । कला, साहित्यले जोडेको हुन्छ,’ कवि तीर्थले भने, ‘सुदूरपश्चिमले नेपालीलाई जोड्न अभियान थालेको छ । यो अरु प्रदेशले पनि सिक्ने कुरा हो ।’

सुदूरपश्चिमको पर्यटन प्रबद्र्धन तथा कला संस्कृतिलाई सुदूरपश्चिम बाहिर पनि लगेर त्यहाँका कला–संस्कृतिकर्मीबीच पुर्याउने मुख्य उद्देश्य भएको सुदूर–पश्चिमाञ्चल साहित्य समाजका अध्यक्ष रामलाल जोशीले बताए । ‘जहाँबाट नेपाली भाषाको उत्पति भयो र त्यो भाषाले संसारभरिका नेपालीलाई जोड्यो तर त्यही ठाउँलाई मान्छेहरुले चिननेन्,’ मदन पुरस्कार विजेता कृति ऐनाका लेखकसमेत रहेका जोशीले भने, ‘देश दर्शन अभियानले विभिन्न ठाउँमा सुदूरपश्चिमको सम्बन्ध जोड्ने र त्यहाँको जीवन तथा जगतलाई नजिकबाट नियाल्ने अवसर प्रदान गर्ने विश्वास लिएका छौं ।’

सुदूर–पश्चिमेली भाषाको व्याप्ति जताजतै भएपनि त्यहाँको कला संस्कृति सुदूर–पश्चिममै थन्किएको जोशीको भनाइ छ । ‘विगतका दिनमा सुदूरपश्चिमले आफ्ना कला–संस्कृतिमार्फत राष्ट्रपति, प्रधानमन्त्री लगायत अन्य उच्च ओहोदाका व्यक्तित्वलाई स्वागत गर्दै आइरह्यो । तर, त्यो केवल रमिताको रुपमा हेरियो,’ जोशीले भने, ‘अब एकले अर्कालाई चिन्नुपर्छ । भाषा, साहित्य र संस्कृतिले देश एकीकरण हुनुपर्छ ।’ कार्यक्रममा सुदूरपश्चिम र पोखराका कविले एउटै मञ्चबाट फरक स्वादको कविता पनि सुनाएका थिए ।

सुदूरपश्च्मिको ४५ सदस्य रहेको समूह महेन्द्रनगर, नेपालगञ्ज, चितवन, नवलपरासी हुँदै पोखरा आइपुगेको हो । पोखरापछि समूह काठमाडौं, जनकपुर, इटहरी हुँदै भारतको आसाम, गुवाहाटी, सिक्किम, दार्जिजिङ लगायतका सहरमा पुगेर चैत २९ गते टोली धनगढी फर्किनेछ । पोखरेली युवा साँस्कृतिक परिवार, हिमाली साँस्कृतिक परिवार, संगीत प्रशिक्षण केन्द्र लगायतका संस्थाले सुदूरपश्चिमको अभियानलाई पोखरामा देखाउने चाँजो मिलाएका थिए ।