चर्को घामको सोझो प्रभावले छालाको क्यान्सर हुनसक्छ, यसरी लगाउने सन क्रिम

घामको राप बढ्दैछ । घर बाहिर हिँडडुल गर्दा घामले पोल्छ, छाला डढाउँछ । घामको सोझो प्रभावले छालाको सौन्दर्य नष्ट गर्छ । साथसाथै यसको विकिरणले छालाको क्यान्सर हुने खतरा पनि रहन्छ ।

घामको सोझो रापबाट बच्ने कसरी त ? यसका केही काइदा छन् ।

पहिलो, चर्को घाममा घरबाहिर नहिँड्ने । बिहान वा साँझ मात्र घरबाहिर हिँडडुल गर्न सकिन्छ । दोस्रो, घरबाहिर निस्कदा छाता ओड्ने । सल वा पातलो कपडाले शरीरका नाङ्गो भाग ढाक्ने । तर, दैनिक कामकाजका लागि हामीलाई कहिले कहाँ-कहिले कहाँ पुगिरहनुपर्छ । घरबाहिर निस्कनुपर्छ । चर्को घाममा काम गर्नुपर्छ, हिँड्नुपर्छ । यस्तो अवस्थामा घामको असरबाट छालालाई बचाउन सन प्रोटेक्सन क्रिम लगाउने गरिन्छ ।

हुन त चर्को घाममा मात्र होइन, अन्य दिनमा पनि सन प्रोटेक्सन क्रिम प्रयोग गर्नुपर्छ । यसले घामको किरणलाई छालाको तहसम्म पुग्न दिदैन । र, छालाको सौन्दर्य जोगाउँछ ।

त्यसो त धेरैजसोले सन प्रोटेक्सन क्रिम प्रयोग गरिरहेकै पनि हुन्छन् । सन प्रोटेक्सन क्रिम अहिले अनिवार्य जस्तै भएको छ । तर, सन प्रोटेक्सन क्रिम कसरी प्रयोग गर्ने, कुन प्रयोग गर्ने, कति प्रयोग गर्ने भन्ने बारे हामीलाई हेक्का हुँदैन । यही कारण सन प्रोटेक्सन क्रिमले प्रभावकारी रुपमा काम गरिरहेका हुँदैन ।

कसरी प्रयोग गर्ने त ?

– आफु बस्ने क्षेत्रको तापमान अनुसारको एसपिएफ हेरेर उपयुक्त सन प्रोटेक्सन क्रिम प्रयोग गर्नुपर्छ । यस्ता क्रिममा एसपिएफ उल्लेख गरिएको हुन्छ, जसले सन प्रोटेक्सन फ्याक्टर भन्ने जनाउँछ ।

– छालामा सोझै क्रिम लगाउनु हुँदैन । पहिला मोश्चराइजर लगाउनु त्यसमाथिबाट सन प्रोटेक्सनको लेपन लगाउने ।

– घाममा निस्कनु २० मिनेटअघि नै सन प्रोटेक्सन क्रिम लगाउनुपर्छ । किनभने, सन क्रिममा रहेको इन्ग्रीडिएन्ट्सलाई सक्रिय हुनका लागि कम्तिमा २० मिनेट लाग्छ ।

– घामबाट आउनसाथ तुरुन्तै अनुहार धुनु हुँदैन । किनभने यसले तपाईको रक्तवहानी नलीलाई तापमान अनुकुल हुने मौका मिल्दैन ।

– बाहिरबाट आउनसाथ छालालाई कोठाको सामान्य तापमानमा आउन दिने । त्यसपछि पानी छर्किएर छाला सफा गर्ने । छाला धुनसाथ टोनर आवश्य लगाउनुपर्छ ।

– संभव भएसम्म गर्मीको मौसममा मध्यान्ह १२ बजेदेखि ४ बजेसम्म घरबाहिर निस्कनु उपयुक्त हुँदैन । किनभने यस समयमा अत्याधिक गर्मी हुन्छ ।

– बाहिर हिँड्दा अनुहारमा माक्स लगाउनु उपयुक्त हुन्छ ।

– सन प्रोटेक्सन क्रिमलाई धेरै रगडेर लगाउनु हुँदैन । साथै क्रिमलाई थोरै पनि लगाउनु हुँदैन, जसले छालालाई सुरक्षा प्रदान गर्दैैन ।

घामको बिकिरण खतरनाक

बेलायतको अखबार ‘डेली मेल’ले एउटा रिपोर्ट प्रकासित गरेको छ, जसमा सूर्यको सोझो किरणको प्रभाव कति हानिकारक हुन्छ भन्ने तथ्य उल्लेख छ । उक्त खबर अनुसार घामको सोझो प्रभावले छालालाई रुखो र बुढो बनाउँछ । घामको किरणले हाम्रो छालालाई सामान्यभन्दा सात बर्ष बुढो बनाइदिने दावी गरिएको छ । साथै छालामा दाग, धब्बा आउने, चाहुरी पर्ने जस्ता समस्या पनि हुन्छ ।

केवल १५ मिनेटमा सूर्यको पराबैंगनी किरणले छालाको सौन्दर्यलाई नष्ट गर्छ । हुन त जीवनको अस्तित्वको लागि घाम नभई हुँदैन । तर, पराबैंगनी किरण भने स्वास्थ्यका लागि एकदमै हानिकारक छ । यसले छालामा क्यान्सर जस्ता रोग निम्त्याउन सक्छ ।

घामको सोझो प्रभावले छाला रुखो हुने, क्यान्सर हुने वा आँखाको दृष्टि कमजोर बनाउन सक्छ ।

हरेक दिन सन् प्रोटेक्सन क्रिम लगाउनु किन आवश्यक छ ?

स्किन क्यान्सरको संभावना कम गर्नका लागि

हानिकारक किरणबाट छालालाई रक्षा गर्नका लागि

दाग धब्बाबाट बच्नका लागि

उमेरभन्दा अगाडि नै बुढोपन देख्नबाट बच्नका लागि