२६ जेठ, चितवन । निर्माणाधिन गौतमवुद्ध अन्तर्राष्ट्रिय क्रिकेट रंगशालाको बारमा डोजर लगाएर भत्काएको अभियोगमा पक्राउ परेका थप चार जना रिहा भएका छन् ।
जिल्ला प्रहरी कार्यालय चितवनले आइतबा राति करीव १०.३० बजे डोजर प्रकरणका मुख्य आरोपी मानिएका प्रकाश कँडेल, भैरव बास्ताकोटी, सुरेन्द्र बि.क. र धुव्र चापागाई रिहा गरेको हो । भरतपुर महानगरपालिकाकी मेयर रेनु दाहाल, प्रदेश सभाका सांसद विजय सुवेदी, चितवनका प्रहरी प्रमुख दानबहादुर मल्ल लगायतको उपस्थितिमा उनीहरुलाई रिहा गरिएको हो ।
प्रमुख जिल्ला अधिकारी जितेन्द्र वस्नेतले पक्राउ परेका चारै जनालाई हाजिरी जमानीमा छाडिएको बताए । घटना घटाउने पक्षले क्षमायाचना गर्ने र भत्काएको बार पुर्ननिर्माण गर्ने विषयमा सहमति जनाएपछि रंगशाला निर्माणमा थप वातावरण बनाउन रिहा गरिएको प्रजिअ वस्नेतले बताए ।
पक्राउ परेका चारै जनाले संयुक्त प्रेस विज्ञप्ती जारी गर्दै जेठ १५ गते विहान डोजर लगाएर बार भत्काउने कार्यप्रति दुःख व्यक्त गर्दै क्षमायाचना गरेका छन् । उनीहरुले भत्काएको पश्चिम तर्फको बारलाई तत्काल यथास्थानमा पुर्ननिर्माण गरी रंंगशालालाई हस्तान्तरण गर्ने विज्ञप्तीमा उल्लेख गरेका छन् ।
रंगशाला निर्माणको हाल रोकिएको कामलाई सुचारु गराउन धुर्मस सुन्तली फाउण्डेशनलाई आब्हान पनि गरिएको छ ।
रंगशालाको बार भत्काएपछि फाउण्डेशनले काम रोकेको छ । भरतपुरकी मेयर रेनु दाहालले रंगशाला निर्माणको काम अब द्रुत गतिमा अघि बढ्ने र स्थानीय जनताको पनि साथ रहने विश्वास व्यक्त गरिन् ।
