१८ साउन, काठमाडौं । अविरल वर्षापछि आएको बाढी र पहिरोमा परेर दोलखामा २ जना बेपत्ता भएका छन् । पहिरोले करिब १५ घरमा क्षति पुगेको छ ।
गौरीशंकर गाउँपालिका–१ को झगरेमा पहिरोले घर पुरिँदा ५६ वर्षीय जगतबहादुर खत्री बेपत्ता भएको नेपाल प्रहरीका डीएसपी मानबहादुर राईले अनलाइनखबरलाई जानकारी दिए । राईका अनुसार प्रहरी र स्थानीयको सक्रियतामा अहिले बेपत्ता खत्रीको खोजी कार्य भइरहेको छ ।
त्यस्तै, जुगुखोलामा आएको बाढीमा बगेर १९ वर्षीय निशान खड्का हराइरहेका छन् । खोलामा बस खसेपछि त्यसमा रहेका आफन्तको उद्धारका लागि पुगेका खड्का आफैं नदीमा बगेर बेपत्ता भएका हुन् ।
नदीमा खसेको बसका यात्रुको भने सकुशल उद्धार गरिएको डीएसपी राईले जानकारी दिए ।
पहिरोले १५ घर जोखिममा
गौरीशंकर गाउँपालिका–१ को झगरेमा बस्तीमाथिबाट भिषण पहिरो खसेको छ । पहिरोले त्यहाँ रहेका १५ घरमा क्षति पुगेको प्रहरीले जनाएको छ ।
दोलखामा कार्यरत नेपाल प्रहरीका डीएसपी राईका अनुसार, क्षति पुगेका र जोखिममा परेका बस्तीका सबै मानिसहरूलाई सुरक्षित स्थानमा सारिएको छ ।
‘पहिरोले क्षति पुगेका र जोखिममा पुगेका घरका मानिसहरूलाई उद्धार गरेर सुरक्षित स्थानमा सारेका छौं’, डीएसपी राईले भने, ‘घटनास्थलमा थप प्रहरी पठाएर राहत वितरणलाई समेत प्रभावकारी बनाएका छौं ।’
