१३ कात्तिक, काठमाडौं । स्कटल्याण्डले यूएईलाई ९० रनले हराएको छ र टी–२० विश्वकपमा स्थान बनाएको छ ।
दुबईमा जारी विश्वकप छनोटको पाँचौं स्थानको प्ले अफ सेमिफाइनलमा बुधबार स्कटल्याण्ड र यूएईले प्रतिस्पर्धा गरेका थिए ।
पहिले ब्याटिङ गरेको स्कटल्याण्डले ६ विकेट गुमाएर १९८ रन बनायो । उसका जर्न मान्सीले ६५ रन बनाए भने रिची बेरिङटन मात्र २ रनले अर्धशतक बनाउन चुके ।
जवाफमा मैदान उत्रिएको घरेलु टोलीले १८.३ ओभरमा १०८ रन बनाउँदा सबै विकेट गुमायो । उसका रमिन शाहजादले सर्वाधिक ३४ रन बनाए । यूएईलाई सस्तैमा समेट्ने क्रममा स्कटल्याण्डका शाफियान शरिफ र मार्क वाटले ३–३ विकेट लिए ।
पपुवा न्यूगिनी, आयरल्याण्ड, नेदरल्याण्ड्स र नामिबिया यसअघि नै विश्वकपमा पुगिसकेको छन् ।
ग्लोबल छनोटबाट विश्वकपमा पुग्ने अन्तिम टोलीको टुग्गो हङकङ र ओमानको खेलबाट लाग्नेछ ।
