२१ कात्तिक, काठमाडौं । स्पेनिस जाइन्ट रियल मड्रिडले ब्राजिलियन स्टार नेयमारमाथि आँखा लगाएको धेरै भयो । तर यो सिजन पनि उसले क्लबमा भित्र्याउन सकेन ।
बुधबार च्याम्पियन्स लिगमा गालाटोसरेविरुद्ध खेल्दा रियलका समर्थकहरुले नेयमारलाई बिर्सिएका छन् । १८ वर्षीय फर्वाड रोड्रिगोलाई नयाँ नेयमारका रुपमा देखे ।
चौथो मिनेट !
रोड्रिगो च्याम्पियन्स लिगमा गोल गर्ने सबैभन्दा कान्छो ब्राजिलियन फुटबलर बने ।
सातौं मिनेट !
च्याम्पियन्स लिगकै इतिहासमा एउटै खेलमा दुई गोल गर्ने सबैभन्दा कान्छो खेलाडी बने ।
तर ९० मिनेटको अन्त्यपछि उनी प्रतियोगितामा हृयाट्रिक गर्ने दोस्रो कान्छो खेलाडी बन्न सफल भए । उसो त उनले १४ औं मिनेटमा नै हृयाट्रिक पुरा गर्न सक्थे । तर रियलले पाएको पेनाल्टी हान्न कप्तान सर्जिओ रामोस आफैं अगाडि सरे ।
पहिलो हाफको इन्जुरी टाइममा करिम बेन्जिमालाई गोल पास दिएका उनले इन्जुरी टाइममा हृयाट्रिक पूरा गरे । च्याम्पियन्स लिगमा सबैभन्दा कम उमेरमा हृयाट्रिक गर्ने उनी रियलका लेजेन्ड राहुलपछि दोस्रो फुटबलर हुन् । ‘बेर्नाबाउमा मेरो नाम लिइरहेको सुन्दा मेरो सपना पूरा भयो,’ उनले भने, ‘म एकदमै खुसी छु । यो रमाइलो रात हो तर म प्रयास गर्छु कि शान्त रहुँ ।’
‘नयाँ नेयमारको उपमा’
हुन त उनलाई यसअघि नै ‘नयाँ नेयमार’ भन्न थालिएको थियो । किनकी पेरिस सेन्ट जर्मेनका फवार्ड नेयमारको बाटो पछ्याउँदै ब्राजिलियन क्लब सान्तोषबाट स्पेन आएका थिए । उचाई पनि नेयमारको समान ५ फिट ९ इन्च छ ।
रोड्रिगोले सन् २०१७ मा १६ वर्षको उमेरमा सान्तोषबाट व्यवसायिक फुटबल खेल्न थालेका थिए । तर रियल मड्रिड नआउँदासम्म दक्षिण अमेरिका बाहेक अन्यन्त्र उनका विषय कमै मानिस जानकार थिए । रियल आएपछि ‘नयाँ नेयमार’का रुपमा हेर्न थालियो । रियलमा उनले ६ खेलमा पाँच गोल गरेका थिए ।
तर उनी भने त्यसलाई मान्न तयार छैनन् । उनले भन्ने गरेका छन्, एउटा मात्र नेयमार छन्, अर्को छैन ।’
उनले अघि भने ‘म रियल मड्रिडको रोड्रिगो हुन चाहन्छु ।’
