२०८३ भदौ ५ गते १२:०१ 
News Summary
Generated by OK AI. Editorially reviewed.- सर्वोच्च अदालतको आदेशपछि इमरान खानलाई शुक्रबार बिहान आदियाला जेलबाट इस्लामाबादस्थित शिफा इन्टरनेसनल अस्पताल सारिएको छ ।
- ७३ वर्षीय पूर्वकप्तान इमरानको बिग्रँदो स्वास्थ्यका कारण बहुविषयगत चिकित्सक टोलीबाट परीक्षण र उपचार गर्न अदालतले आदेश दिएको हो ।
- पीटीआईले अस्पताल सारिएको पुष्टि गर्दै इमरानमाथि लगाइएका भ्रष्टाचारका आरोप राजनीतिक प्रेरित भएको दाबी गर्दै आएको छ ।
६ भदौ, काठमाडौं । पाकिस्तान क्रिकेटका विश्वविजेता पूर्वकप्तान तथा पूर्वप्रधानमन्त्री इमरान खानलाई सर्वोच्च अदालतको आदेशपछि जेलबाट इस्लामाबादस्थित निजी अस्पतालमा सारिएको छ ।
७३ वर्षीय इमरानलाई शुक्रबार बिहान कडा सुरक्षा व्यवस्थाबीच आदियाला जेलबाट शिफा इन्टरनेसनल अस्पताल लगिएको हो । पाकिस्तानको सर्वोच्च अदालतले उनको बिग्रँदै गएको स्वास्थ्य अवस्थालाई ध्यानमा राख्दै बहुविषयगत चिकित्सक टोलीबाट परीक्षण र उपचार गराउन आदेश दिएको थियो ।
इमरानको दल पाकिस्तान तेहरिक–ए–इन्साफ (पीटीआई) ले पनि उनलाई अस्पताल सारिएको पुष्टि गरेको छ ।
इमरानको स्वास्थ्यबारे उनको दल र कानुनी टोलीले फेब्रुअरीदेखि लगातार चिन्ता व्यक्त गर्दै आएका थिए। एक समय उपचार नपाउँदा उनको दाहिने आँखाको दृष्टि १५ प्रतिशतमा झरेको दाबी पनि गरिएको थियो। त्यसपछि उनलाई केही पटक सरकारी अस्पतालमा छोटो अवधिका लागि परीक्षण गराइएको थियो ।
यसअघि ग्रेग च्यापेल, सुनील गावस्कर र कपिल देवसहित १४ पूर्व अन्तर्राष्ट्रिय कप्तानले पाकिस्तानका प्रधानमन्त्री शहबाज शरीफलाई खुला पत्र लेख्दै इमरानलाई सम्मानजनक र मानवीय व्यवहारसहित उचित उपचार उपलब्ध गराउन आग्रह गरेका थिए ।
सन् २०२३ अगस्टदेखि आदियाला जेलमा रहेका इमरान भ्रष्टाचारसम्बन्धी विभिन्न मुद्दामा सजाय भोगिरहेका छन् । उनी र उनको दलले भने सबै आरोप राजनीतिक प्रेरित भएको दाबी गर्दै आएका छन् ।
-क्रिकइन्फोबाट
प्रतिक्रिया 4