५ फागुन, काठमाडौं । नवनियुक्त कानून, न्याय तथा संसदीय मामिलामन्त्री शिवमाया तुम्बाहाङ्फेले आवश्यकताले कानून मन्त्रालयको जिम्मेवारी पाएको प्रतिक्रिया दिएकी छन् ।
हालै मात्र उपसभामुखबाट राजीनामा दिएकी तुम्बाहाङ्फेलाई सोमबार प्रधानमन्त्री केपी शर्मा ओलीको सिफारिसमा राष्ट्रपतिले कानूनमन्त्री नियुक्त गरेकी थिइन् । सोमबार सपथ दिएकी उनले पदभार पनि ग्रहण गरिसकेकी छन् ।
पदभार सम्हालेपछि सञ्चारकर्मीहरुसँग कुराकानी गर्दै कानूनमन्त्री तुम्बाहाङफेले मौलिक हकसँग जोडिएका ऐनहरु बनेपनि नियमावली निर्माणका क्रममा रहेकाले त्यो आफ्नो पहिलो प्राथमिकता भएको बताइन् ।
माघ ६ मा उपसभामुखबाट राजीनामा दिँदा कानून मन्त्रालय दिने योजना सहमति भएको थियो भन्ने पत्रकारहरुको प्रश्नमा तुम्बाहाङ्फेले भनिन्, ‘त्यतिबेला र अहिलेको अवस्था फरक हो ।’
उपसभामुखका रुपमा कामा गर्दा आफ्नो उद्देश्य संसद र दलहरुको फरक छुट्टाउन सिस्टम बनाउन काम गरेको र संविधानले भनेअनुसार राजीनामा गरेर आफू बाहिर आएको बताइन् । उनले भनिन्, ‘सिस्टम बसाउनुपर्छ भन्ने मेरो अडान थियो, त्यो पुरा गरेर म बाहिर निस्किएँ । त्यो अवधिभन्दा अगाडिको च्याप्टर क्लोज भयो ।’
राजीनामाको घोषणा गर्दा नै आफूले युटर्न गरेर अगाडि बढ्छु भनेको स्मरण गर्दैै उनले भनिन्, अहिले ट्र्याक चेन्ज गरेर यहाँ आइपुगेको छु । अब मेरो भूमिका भनेको यो ठाउँमा बसेर हुन्छ । संविधान र ऐनकानुन अनुसार काम गर्छु ।’
मन्त्री हुनु योजनावद्ध थियो भन्ने प्रश्नमा उनले भनिन्, ‘एउटा चिजचाहिँ योजनावद्ध हुन्छ । मेरो आफ्नो भन्नुहुन्छ भने राजनीतिमा गएपछि यो गर्छु भन्ने योजना छ ।’
कानून मन्त्रालय चाहिँ तपाईले रोजेको कि नेताहरुले दिएको भन्ने प्रश्नमा उनले भनिन्, आवश्यकता दिएको हो । मेरो रोजाई, नेताहरुले दिने … लिने दिने होइन, आवश्यकता हो ।’
