१९ फागुन, काठमाडौं । हुवे प्रान्तबाट फैलिएको नोवेल कोरोना (कोभिड–१९) भाइरसको नयाँ केस देखिने दर चीनमा भन्दा दक्षिण कोरिया र इरानमा बढी छ । दक्षिण कोरियामा ५९९ र इरानमा ५२३ जनामा कोरोनाको नयाँ केस देखिएको छ ।
जबकी पछिल्लो पटक चीनमा २०२ जनामा यो संकेत देखिएको हो ।
दक्षिण कोरियामा सोमबार अपरान्हसम्म ४ हजार ३३५ जनामा कोभिड–१९ को संकेत देखिएको छ । दक्षिण कोरिया चीनपछि सबैभन्दा बढी यो भाइरस संक्रमित देश बन्न पुगेको छ ।
दक्षिण कोरियामा अहिलेसम्म २६ जनाको ज्यान गइसकेको छ । २७ जना बिरामी गम्भीर छन् । ३० जनाले भने स्वास्थ्य लाभ गरिसकेका छन् ।
इरानमा १ हजार ५०१ जनामा यो भाइरसको संकेत देखिएको छ भने ६६ जनाको मृत्यु भइसकेको छ ।
७० देशका ९० हजारमा कोरोना
चीन, दक्षिण कोरिया र इरानमा गरेर कुल १ हजार ३९१ नयाँ केस देखिएको हो । गत डिसेम्बरबाट ७० देशमा फैलिएको कोरानाको संकेत कुल ९० हजारमा देखिएको छ । जसमध्ये ८० हजार भन्दा बढी चीनका छन् ।
यसको संकेत देखा परेका मध्ये आधा भन्दा बढी अर्थात करिब ४६ हजार जनाले स्वास्थ्य लाभ गरिसकेका छन् । ७ हजार ३७५ जना भने गम्भीर छन् ।