२० फागुन, काठमाडौं । १४० मेगावाट जडित क्षमताको तनहुँ जलविद्युत आयोजनाको बाँध लगायतका पहिलो प्याकेजका संरचना निर्माणका लागि पुनः बोलपत्र आह्वान गरिएको छ । यसअघिको बोलपत्रमा परेका ४ वटै कम्पनीको प्रस्तावलाई दातृ निकाय एसियाली विकास बैंक (एडीबी)ले अयोग्य ठहराएको थियो ।
आयोजनाको प्रवर्द्धक तनहुँ हाइड्रोपावर लिमिटेडले शुक्रबार एउटै कामका लागि तेस्रोपटक ४५ दिनको समय दिएर टेन्डर गरेको कम्पनीका प्रबन्ध सञ्चालक प्रदीपकुमार थिकेले जानकारी दिए ।
उनका अनुसार दोस्रोपटक दातृ निकाय एसियाली विकास बैँक (एडीबी)को खरिद निर्देशिकाअनुसार एकै चरणमा प्राविधिक र आर्थिक प्रस्ताव पेश गर्ने गरी बोलपत्र आह्वान गरिएको थियो । जसमा चाइना गेजुवा ग्रुप कम्पनी लिमिटेड चाइना, सिनो हाइड्रो कर्पोरेसन लिमिटेड चाइना, चाइना नेशनल इलेक्ट्रिक इन्जिनियरिङ कर्पोरेसन लिमिटेड र सोङ डा कर्पोरेसन भियतनाम/कालिका कन्ट्रक्सन नेपाल जेभीले प्रस्ताव पेश गरेका थिए ।
आयोजनाले कम्पनीहरुले पेश गरेको प्राविधिक बोलपत्रको मूल्याङ्कन गरेर एडीबीमा प्रतिवेदन पठाएको थियो । तर, एडीबीले कम्पनीको योग्यताको कारण देखाउँदै प्रक्रिया स्थगित गर्न आयोजनालाई भनेको थियो । उसले कम्पनीका सहायक ठेकेदारहरुको योग्यता नपुगेको तर्क गरेको थियो ।
नेपालमा ठूला आयोजनामा काम गरिररहेको सिनो, गेजुवा जस्ता कम्पनीलाई पनि उपठेकेदारको योग्यतामा प्रश्न उठाएर एडीबीले नयाँ टेन्डरमा जान दबाव दिएको थियो ।
पहिलो संरचना निर्माणका लागि इटालियन कम्पनी इटालियन सीएमसीसँग भएको ठेक्का सम्झौता रद्द गरिएपछि तनहुँ हाइड्रोपावरले गत १२ वैशाखमा पुनः अन्तर्राष्ट्रिय टेण्डर आव्हान गरेको थियो ।
सुरुमा बोलपत्र पेश गर्ने अन्तिम दिन २६ जेठ (९ जुन २०१९) तोकिएकोमा बोलपत्र पेश गर्न इच्छुक कम्पनीले समय थप गर्न माग गरेपछि २८ दिन थप गरिएको थियो ।
तर, प्रक्रिया पूरा गरेर कम्पनी छनोटको समयमा एडीबीले प्रस्तावक ४ वटै कम्पनीलाई अयोग्य ठहराएपछि आयोजना फेरि ठेक्का गर्न बाध्य भएको हो ।
एडीबीको प्राविधिक मूल्याकंनको चक्करमा आयोजना डेढ वर्षपछि धकेलिन पुगेको छ । सन् २०२३ सम्म बनाइसक्ने लक्ष्य रहेको आयोजनामा अब सन् २०२५ को जुनसम्म धकेलिने अवस्था आएको हो ।
यो प्याकेजमा छनोट हुने निर्माण व्यवसायी कम्पनीले आयोजनाको १४० मिटर अग्लो कंक्रिट बाँध, नदी फर्काउने दुईवटा सुरुङ, अस्थायी बाँध लगायतका संरचना निर्माण गर्नु पर्ने छ । पहिलो प्याकेजको संरचना निर्माणका लागि दातृ निकायहरु एसियाली विकास बैक (एडीबी) र युरोपेली लगानी बैक (इआइबी)को सहुलितपूर्ण ऋण परिचालन हुने छ ।
आयोजनाको सुरुङ, विद्युत गृह निर्माण र हाइड्रोमेकालिन तथा इलेक्ट्रोमेकानिकल उपकरण आपूर्ति, जडान तथा सञ्चालन लगायतका दोस्रो प्याकेजका काम गर्ने चिनियाँ कम्पनी सिनो हाइड्रो कर्पोरेसन लिमिटेडले आयोजनस्थलमा काम गरिरहेको छ ।
सिनो हाइड्रोले अहिले आयोजनास्थलमा कार्यालय भवन, श्रमिक आवास गृहलगायतका संरचना निर्माण, आयोजनाको प्रवेश मार्ग र अन्य संरचनाको सर्वेक्षण, डिजाइन र निर्माण गरिरहेको छ ।
आयोजनाको तेस्रो प्याकेज अन्तर्गत दमौलीबाट चितवनको भरतपुरसम्म २२० केभीको डबल सर्किट प्रसारण लाइन निर्माणका लागि भारतीय कम्पनी केइसीसँग ठेक्का सम्झौता भइसकेको छ ।
आयोजनाको कुल लागत अमेरिकी डलर ५० करोड ५० लाख (प्रशारण लाइन, ग्रामीण विद्युतिकरण तथा निर्माण अवधिको ब्याज समेत) रहेको छ । यसमध्ये एडीबीले १५ करोड, जापान अन्तराष्ट्रिय सहयोग नियोग (जाईका) ले १८ करोड ४० लाख, इआईबीले ८ करोड ५० लाख र नेपाल सरकार तथा नेपाल विद्युत प्राधिकरणले ८ करोड ७० लाख अमेरिकी डलर व्यर्होने गरी वित्तीय व्यवस्थापन गरिएको छ ।
यसका लागि सम्बन्धित दातृ निकायहरु र नेपाल सरकारबीच ऋण सम्झौताहरु तथा नेपाल सरकार र प्राधिकरण एवं प्राधिकरण र यस कम्पनीबीच सहायक ऋण सम्झौताहरु सम्पन्न भइसकेका छन् ।
