२१ वैशाख, वीरगञ्ज । पर्साको कालिकामाई गाउँपालिका–३ हरिहरपुरबिर्तामा बालिका बलात्कारको आरोप लागेका युवकमाथि कुटपिट भएको छ । प्रहरीले बलात्कारको आरोपी युवक र उनीमाथि कुटपिट गर्ने ४ जना गरी पाँच जनालाई पक्राउ गरेको छ ।
स्थानीय २२ बर्षीय दीपेन्द्र चौरसियालाई १४ बर्षीया बालिका बलात्कार गरेको आरोप लागेको छ । वैशाख १९ गते राति चौरसियाले बालिकाको बलात्कार गरेको भन्दै भोलिपल्ट हरिहरपुर विर्तामा चौरसियामाथि कुटपिट भएको थियो ।
चौरसियालाई कुटपीट गरेका आरोपमा ईम्तियाज मिया, तैयब मिया, नौसाद मिया र मुस्तकिम मियाँ पक्राउ परेका छन् ।
बलात्कारको आरोपी चौरसिया र कुटपीटमा संलग्न सबैलाई नियन्त्रणमा लिएर आवश्यक अनुसन्धानका लागि जिल्ला प्रहरी कार्यालय पठाएको इलाका प्रहरी कार्यालय पोखरीयाका प्रहरी निरीक्षक चन्द्रकुमार सिंहले जानकारी दिए ।
‘केटी पक्षले चौरसियाले बालिकाको बलत्कार गरेको आरोप लगाएको छ । केटा पक्षले निर्घात कुटपीट गरेको दावी गरेका छन्’ उनले भने ‘घटनामा म्ुछिएका पाँचै जनालाई पक्राउ गरेर अनुसन्धानका लागि जिल्ला पठाएका छौं ।’
बालिकाको स्वास्थ्य परीक्षण र चौरसियाको घाउँजाँच परीक्षण लगायतका प्रारम्भिक अनुसन्धानको काम प्रहरीले गरिरहेको छ । दुवैको रिपोर्टको आधारमा मात्रै उनीहरुको दावी सत्य हो वा झुठो पुष्टी हुने प्रहरीको भनाइ छ ।
