२३ वैशाख, चितवन । रिएजेन्ट किटको अभावले चितवनको भरतपुरमा स्थापना गरिएको कोरोना भाइरस (कोभिड–१९) परीक्षण गर्ने पीसीआर ल्याब पाँच दिनदेखि बन्द भएको छ ।
भरतपुर अस्पताल मातहत रहेको ल्याब रिएजेन्ट किट अभावमा बन्द भएको अस्पतालका सूचना अधिकारी लिलाधर पौडेलले जानकारी दिए । उनका अनुसार आवश्यक रिएजेन्ट स्वास्थ्य मन्त्रालयसँग माग गरिएको छ ।
बुधबार वा बिहीबारसम्म किट आइपुग्ने उनले दावी गरे । दोस्रो पटक ल्याइएको एक सय वटा कीट समेत सकिएपछि प्रयोगशाला नै बन्द भएको हो । ल्याब बन्द भएपछि कोरोना संक्रमणको आशंका गरिएका व्यक्तिहरुको परीक्षणमा समस्या भएको छ ।
अहिले स्वाब संकलन गरि हेटौडास्थित ल्याबमा पठाइएको सूचना अधिकारी पौडेलले जानकारी दिए । वैशाख २० गते २८ जनाको र २२ गते १२ जनाको स्वाब संकलन गरी परीक्षणका लागि हेटौडा पठाइएको छ ।
त्यसमध्ये २० गते पठाइएका २८ जनाको परीक्षण रिपोर्ट नेगेटिभ आएको छ भने, १२ जनाको आउन बाँकी छ । भरतपुर प्रयोगशालामा अहिलेसम्म ५७३ भन्दा बढीको पिसिआरबाट कोरोना परीक्षण गरिएको छ ।
