९ असार, काठमाडौं । तानसेनको सम्मोबारीमा पहिरोले गाडी बगाउँदा मृत्यु भएका तीनै जनाको पहिचान खुलेको छ ।
पाल्पाका डीएसपी मदन गिरीका अनुसार मुत्यु हुनेमा चितवन भरतपुर नगरपालिका–२९ बांगेसालका ३३ वर्षीय वीरबहादुर गुरुङ, पाल्पा रिब्दीकोट गाउँपालिका–२ देउरालीका ३२ वर्षीय भुवन खाम्चा र काभ्रेपलाञ्चोक पाँचखाल नगरपालिका–८ हुस्केबजारका २८ वर्षीय निवेश श्रेष्ठ छन् । घटनास्थलमा प्राप्त काजगपत्रका आधारमा मृतकका आफन्तसँग सम्पर्क भइसकेको डीएसपी गिरीले बताए ।
प्रहरीले घटनास्थलबाट दुई जनाको शव निकालेको थियो भने एक जनालाई जिवितै उद्धार गरी उपचारका लागि मिसन अस्पताल पठाएकोमा उनको उपचारको क्रममा मृत्यु भएको थियो ।
पाल्पाबाट गुल्मीतर्फ जाँदै गरेको लु २ ख १३७६ नम्बरको ट्रक र लु १ क १९२८ नम्बरको पानी बोक्ने ट्यांकरलाई पहिरोले बगाएको थियो । सडकमाथिबाट खसेको पहिरोले लु १ च ७०११ नम्बरको कार र लु २ च ७०४३ नम्बरको जिपमा समेत क्षति पुर्याएको थियो ।
सडकमा रहेको जिप र कारलाई हटाइएपछि मंगलबार बिहान करिब ८ बजेदेखि एकतर्फीरुपमा सवारीका साधन सञ्चालनमा आएको डीएसपी गिरीले बताए ।
