८ माघ, काठमाडौं । स्पानिस जायन्ट क्लब रियल मड्रिड तेस्रो डिभिजनको अल्कोयानासँग पराजित हुँदै स्पानिस कोपा डेल रेबाट बाहिरिएको छ ।
गएराति भएको खेलमा अतिरिक्त समयमा अल्कोयानासँग २-१ ले स्तब्ध बनेको रियल अन्तिम ३२ बाटै बाहिरिएको हो ।
१० खेलाडीमा समेटिए पनि ११५औं मिनेटमा जुनानले अल्कोयानाका लागि निर्णायक गोल गरेका थिए ।
त्यसअघि एडर मिलिटाओले ४५औं मिनेटमा गोल गर्दै रियललाई अग्रता दिलाएका थिए । तर ८०औं मिनेटमा जोस सोलबासले अल्कोयानाका लागि बराबरी गोल गरे ।
निर्धारित ९० मिनेटको खेल १-१ को बराबरी भएपछि ३० मिनेटको अतिरिक्त समयमा थप गरिएको थियो । १०९ औं मिनेटमा मोन लोपेज रातो कार्ड पाउँदै मैदान बाहिरिँदा अल्कोयाना १० खेलाडीमा समेटियो । तर त्यसले कुनै असर गरेन र ११५औं मिनेटमा जुनानले गोल गर्दै अल्कोयानालाई जित दिलाए ।