२०७८ कात्तिक ३ गते ८:१७ 
काठमाडौं । आईसीसी टी-२० विश्वकपमा बंगलादेशले पहिलो जित हात पारेको छ ।
ओमानको अल अमेरेत क्रिकेट मैदानमा मंगलबार राति भएको खेलमा पहिलो चरणको समूह बी को खेलमा ओमानलाई २६ रनले पराजित गर्दै बंगलादेशले सुपर १२ पसग्ने आशा कायमै राखेको छ । बंगलादेश पहिलो खेलमा स्कटल्याण्डसँग पराजित भएको थियो ।
बंगलादेशले दिएको १५४ रनको लक्ष्य पछ्याएको घरेलु टोली ओमानले २० ओभरमा ९ विकेट गुमाएर १२७ रन मात्र बनाउन सक्यो ।
ओमानका लागि जतिन्दर सिंहले सर्वाधिक ४० रन बनाए । कश्यप प्रजापतिले २१ र कप्तान जिसन मक्सुदले १२ रन जोडे । मोहमद नादिम १४ रनमा अविजित रहे ।
बलिङमा बंगलादेशका मुस्ताफिजुर रहमानले ४, शकिब अल हसनले ३ तथा मोहमद सैफुदीन र मेहदी हसनले एक/एक विकेट लिए ।
यसअघि पहिले ब्याटिङ गरेको बंगलादेशले २० ओभरमा सबै विकेट गुमाएर १५३ रन बनाएको थियो ।
बंगलादेशका लागि ओपनर मोहमद नाइमले ६४ रन बनाए । यस्तै शकिब अल हसनले ४२ र कप्तान महमुदउल्लाहले १७ रन बनाए ।
ओमानका बिलाल खान र फायज बटले ३/३ विकेट लिए । कलिमउल्लाहले २ विकेट लिए ।
पहिलो जितपछ समूह बी मा बंगलादेशले २ खेलमा २ अंक जोडेको छ ।
उता पहिलो खेलमा पपुवा न्युगिनीलाई हराएको ओमानको यो पहिलो हार हो । ओमानको पनि दुई खेलमा दुई अंक छ ।
स्कटल्याण्ड लगातार दुई खेल जित्दै चार अंक जोडेर शीर्ष स्थानमा छ ।
प्रतिक्रिया 4