फिफाको निलम्बनपछि उज्वेकिस्तानबाट फर्किँदै साम्बा सम्मिलित भारतीय टिम

३१ साउन, काठमाडौं । अखिल भारत फुटबल फेडेरेसन (एआईएफफ)माथि विश्व फुटबल महासंघ (फिफा)ले निलम्बन गरेसँगै भारतले अन्तर्राष्ट्रिय प्रतिस्पर्धामा आफ्नो सहभागिता अधिकार गुमाएको छ ।

तेश्रो पक्षको हस्तक्षेप भएको भन्दै फिफाले भारतलाई निलम्बन गरेको थियो । भारतको राष्ट्रिय महिला लिग च्याम्पियनको हैसियदबाट एएफसी महिला क्लब च्याम्पियनसिपका लागि छानिएको श्री गोकुलम केराला एफसीको टिम प्रतियोगितास्थल पुगेर पनि खेल्न नपाई स्वदेश फर्कनुपर्ने भएको छ ।

गोकुलम केराला टिम सोमबार उज्वेकिस्तान पुगेको थियो । यो टिममा नेपाली महिला फुटबलकी सुपरस्टार सावित्रा भण्डारी मुख्य खेलाडीका रुपमा छिन् । गोकुलमलाई राष्ट्रिय लिग जिताउन महत्वपूर्ण भूमिका खेलेकी उनी एएफसीको प्रतियोगितामा एक्स्पोजर पाएकी थिइन् । तर, भारत फुटबल निलम्बनमा परेपछि टिम फर्किनुपर्ने छ ।

एएफसी क्लब च्याम्पियनसिपमा पूर्वी एसियाबाट ३ र पश्चिम एसियाबाट ३ गरी ६ टिमको सहभागिता छ । पूर्वी एसियाको प्रतिस्पर्धामा गोकुलमले इरानको बाम खातून र घरेलु टिम सोग्दियाना डब्ल्यूसँग खेल्ने तालिका थियो ।

गोकुलमले खेल्न नपाउने भएपछि इरान र उज्वेकिस्तानको टिमबीच हुने प्रतिस्पर्धाको विजेता क्लब च्याम्पियनसिपको फाइनलमा पुग्ने भएको छ ।

पश्चिम एसियाबाट चाइनिज ताइपेइको ताइचुङ ब्लू ह्वेल र मलेसियाको आईएसपीई डब्ल्यूएफसी र थाइल्याण्डको कलेज अफ एसियन स्कलरबीच प्रतिस्पर्धा हुनेछ । दुवै क्षेत्रको विजेता टोलीले उपाधिका लागि अक्टोबरमा प्रतिस्पर्धा गर्नेछन् ।