विमल स्मृति पुस्तकालयका सञ्चालक गुरुङलाई ‘उत्कृष्ट पुस्तकालय प्रेमी’ सम्मान

काठमाडौं । विमल स्मृति पुस्तकालय, धरानका सञ्चालक पूर्णबहादुर गुरुङलाई ‘उत्कृष्ट पुस्तकालय प्रेमी’को रुपमा सम्मान गरिएको छ ।

१५ औं पुस्तकालय दिवसको अवसर पारेर रसियन सांस्कृतिक केन्द्रमा कार्यक्रम आयोजना गरी शिक्षा, विज्ञान तथा प्रविधिमन्त्री देवेन्द्र पौडेल र राज्यमन्त्री वोधमाया कुमारी यादवले गुरुङलाई दोसल्ला ओढाएर सम्मानपत्र प्रदान गरे ।

भूतपूर्व गोर्खा सैनिक गुरुङले १९ वर्षको अल्पायुमै निधन भएका आफ्ना छोरा एवं कवि विमल गुरुङको सम्झनामा २०४८ सालमा विमल स्मृति पुस्तकालय स्थापना गरी युवापुस्ताको पठन संस्कृतिको विकासमा योगदान पुर्‍याएका थिए ।

धरान निवासी ८० वर्षीय गुरुङ र विमल पुस्तकालयमा आधारित फिल्म ‘उर्मि’को ट्रेलर समेत त्यस अवसरमा सार्वजनिक गरिएको थियो । फिल्मलाई प्रणय लिम्बूले निर्देशन गरेका हुन् ।