१० माघ, काठमाडौं । फ्रेण्ड्स क्लबले आगामी शहीद स्मारक ए डिभिजन लिगका लागि खेलाडी अनुबन्ध प्रक्रिया सुरु गरेको छ ।
ललितपुरको कुपण्डोलमा रहेको फ्रेण्ड्सले नयाँ सिजनका लागि दुई नयाँ खेलाडी अनुबन्ध गरिसकेको छ ।
फ्रेण्ड्सले युवा फरवार्ड राजेश परिवार र युवा गोलकिपर विशाल सुनारलाई अनुसबन्ध गरिसकेको छ ।
१३ औं साग फुटबलमा राष्ट्रिय टिमबाट स्वर्ण जितेका राजेशले यसअघि न्युरोड टिम एनआरटीबाट लिग खेलेका थिए ।
केही समयअघि मात्रै एनआरटी छाडेका उनी नयाँ क्लब फ्रेण्ड्समा अनुबन्ध भएका हुन् ।
यस्तै गत सिजन मनाङ मर्स्याङ्दी क्लबबाट लिग खेलेका विशाल पनि यस पटक फ्रेण्ड्समा पुगेका छन् ।
विशालले राष्ट्रिय टिममा समेत स्थान बनाइसकेका छन् तर डेब्यु गर्न भने बाँकी छ । यस्तै युवा डिफेण्डर असिम भुसाल पनि फ्रेण्ड्समै रहने भएका छन् ।
असिमसँग सम्झौता नवीकरण गरेको क्लबले जनाएको छ । फ्रेण्ड्सले सामाजिक सञ्जालबाट खेलाडी अनुबन्ध र सम्झौता नवीकरण गरेको जनाएको हो ।
आगामी फागुन १९ गतेबाट सुरु हुने ए डिभिजन लिगको उद्घाटन खेलमा फ्रेण्ड्सले नवप्रवेशी खुमलटार एफसीसँग खेल्दै लिग सुरु गर्नेछ ।
गत सिजन अधिकांश सिजन रेलिगेसन जोनमा रहेको फ्रेण्ड्सले रेलिगेसन भन्दा एक स्थान माथि ११औं स्थानमा रहेर लिग सकाएको थियो ।
प्रतिक्रिया 4