गोल्डेनगेटको तीनै टोली नेबा बास्केटबलको प्रिक्वाटरफाइनलमा

२९ भदौ, काठमाडौं । गोल्डेनगेटको ‘ए’, ‘बी’ र ‘सी’ तीनै टोली नेबा प्लस टु थ्री बाइ थ्री बास्केटबल प्रतियोगिताको ब्वाइजतर्फ शुक्रबार प्रिक्वाटरफाइनलमा प्रवेश गरेको छ ।

गोल्डेनगेटसँगै जेभियर इन्टरनेसनल र सीसीआरसीको ‘ए’ र ‘बी’ टोली तथा नामी, क्याम्पियन, ओमेगा ‘ए’, जेम्स, ट्रिनिटी, प्रिमियर, ट्रिटन, ग्रिनफिल्ड र मनास्लु वर्ल्ड कलेज पनि प्रिक्वाटरफाइनलमा स्थान सुरक्षित गरेका छन् ।

नेपाल बास्केटबल संघको आयोजनामा त्रिपुरेश्वरस्थित राष्ट्रिय खेलकुद परिषद्को सेमी कभर्डहलमा भइरहेको प्रतियोगिताको गर्ल्समा रातो बंगला, नामी, इन्साइट भिजन, एस, जेभियर इन्टरनेसनल ‘बी’, गोल्डेनगेट, जेम्स ‘बी’ र साइपाल एकेडेमी क्वाटरफाइनलमा पुगे ।

प्रतियोगिताको नेपाल बास्केटबल संघका कार्यवाहक अध्यक्ष भीमसिंह गुरुङले एक कार्यक्रमबीच उद्‍घाटन गरेका थिए ।

लिनिङ अफिसियल पार्टनर रहेको प्रतियोगिताको ब्वाइजमा ३२ तथा गर्ल्स १३ टिमले लिग कम नकआउट आधारमा प्रतिस्पर्धा गरिरहेका छन् । शीर्ष तीन स्थान हात पर्ने टिमले त्रिसराबाट गिफ्ट ह्याम्पर प्राप्त गर्ने छन् । ‘मोस्ट भेलुएबल प्लेयर’ लाई लिनिङको गिफ्ट ह्याम्पर प्रदान गरिने छ । प्रतियोगिता आइतबारसम्म जारी रहने छ ।