२०८१ वैशाख ६ गते १६:०१ 
६ वैशाख, काठमाडौं । झम्सिखेल युथ क्लबविरुद्ध पुनरागमन जित निकाल्दै पुल्चोक स्पोर्ट्स क्लब शहीद स्मारक सी डिभिजन लिगको शीर्ष स्थानमा उक्लेको छ ।
सातदोबाटोस्थित एन्फा कम्प्लेक्स मैदानमा बिहीबार भएको पहिलो खेलमा पुल्चोकले एक गोलले पछि परेको स्थिति उल्टाउँदै झम्सिखेललाई ४-१ ले हरायो ।
लगातार तीन जितपछि पुल्चोकले समान ९ अंक जोडेको आरसी ३२ फुटबल एकेडेमीलाई गोल अन्तरमा पछि पार्दै शीर्ष स्थानमा उक्लेको हो ।
खेलको १९औं मिनेटमा ओम धामीले गोल गर्दै झम्सिखेललाई अग्रता दिलाएका थिए । तर पहिलो हाफको इन्जुरी समयमा दुई गोल गर्दै पुल्चोक खेलमा फर्किएको थियो ।
इन्जुरी समयको चौथो मिनेटमा मदन पौडेलले पुल्चोकका लागि बराबरी गोल फर्काए ।
इन्जुरी टाइमको सातौं मिनेटमा श्यारब लो तामाङले पेनाल्टीमा गोल गरेपछि पुल्चोकले २-१ को अग्रता बनायो । श्यारबले नै ५१ औं मिनेटमा व्यक्तिगत दोस्रो गोल गरेपछि पुल्चोकले ३-१ को अग्रता बनाएको थियो । पुल्चोकका लागि चौथो गोल समीप ढकालले ६४औं मिनेटमा गरे ।
झम्सिखेलको भने यो दोस्रो हार हो । तीन खेलबाट उसको ३ अंक नै छ ।
प्रतिक्रिया 4