समीक्षा अधिकारी सिड्नीमा सम्मानित

सिडनी । गायिका समीक्षा अधिकारीलाई अस्ट्रेलियाको सिड्नीमा सम्मान गरिएको छ । लामो समयदेखि सामाजिक कार्यमा आवद्ध राकु समाज अस्ट्रेलियाले नेपाली संगीतमा उल्लेखनीय योगदान पुर्‍याएवापत समीक्षालाई सम्मान गरेको हो ।

कार्यक्रममा राकु समाज अस्ट्रेलियाका अध्यक्ष शिव रकालले गीत-संगीत मार्फत नेपाली समुदायमा उत्साह र चेतना फैलाइरहेकी गायिका अधिकारीलाई सम्मान गर्न पाउँदा खुसी लागेको बताए ।

सिड्नीको ग्रयानभिलमाफ्लेभर्स अफ नेपालको आयोजनामा ‘राकु समाज च्यारिटी नाइट’ नाममा समीक्षाको कन्सर्ट समेत आयोजना गरेको थियो । कार्यक्रममा उनले आफ्ना लोकप्रिय गीतहरु प्रस्तुत गरेकी थिइन् । ‘प्रवासमा आउँदा पनि यसरी मलाई माया गरेर, हौसला प्रदान गरेर सम्मान गरिदिनुभएकोमा सबैमा मनदेखि नै आभार व्यक्त गर्दछु,’ समीक्षाले भनिन् ।

फ्लेभर्स अफ नेपालका प्रमुख राजेश केसीले गायिका समीक्षा अधिकारीको कन्सर्टले सिड्नीबासी संगीतप्रेमी नेपालीमा उत्साह थपिएको बताए ।