प्राध्यापकले बेतलबी बिदा जोडेर पेन्सन लिँदा त्रिविलाई आर्थिक भार

News Summary

Generated by OK AI. Editorially reviewed.

महालेखा परीक्षकको प्रतिवेदनले त्रिभुवन विश्वविद्यालयका प्राध्यापकहरूले बेतलबी बिदा जोडेर पेन्सन लिँदा आर्थिक भार बढेको देखाएको छ।
प्रतिवेदन अनुसार, विश्वविद्यालयको नियम र सरकारी स्वीकृति नलिई पेन्सन वितरण भएको पाइएको छ, जसले सरकारी खर्चमा अनावश्यक वृद्धि गरेको छ।
१२६ जना प्राध्यापकहरूले बेतलबी बिदा जोडेर पेन्सन लिएको पाइएको छ, जसले नियम उल्लंघन भएको संकेत गर्दछ।

३१ वैशाख, काठमाडौं । महालेखा परीक्षकको कार्यालयले त्रिभुवन विश्वविद्यालयका प्राध्यापकले बेतलबी बिदा जोडेर पेन्सन रकम बुझ्दा आर्थिक व्ययभार बढेको निष्कर्ष निकालेको छ ।

बुधबार सार्वजनिक महालेखा परीक्षकको ६२औं प्रतिवेदनमा बेतलबी बिदा जोडेर पेन्सन खाँदा आर्थिक भार बढेको उल्लेख छ । ‘पेन्सन र ग्रेड त्रिभुवन विश्वविद्यालय ऐन, २०४९ को दफा ३३ (क) मा नेपाल सरकारलाई थप आर्थिक व्ययभार पर्ने विषयमा नियम बनाउँदा वा कार्य गर्दा नेपाल सरकारको स्वीकृति लिनुपर्ने उल्लेख छ ।

कार्यकारी परिषद्को २०७६/१०/२१ को निर्णयअनुसार २०६८/१/८ भन्दा अगाडि लिएको असाधारण विदासमेत नोकरी अवधिमा गणना गरी शिक्षक तथा कर्मचारीको पेन्सन दिएको र करारमा कार्यरत शिक्षक तथा कर्मचारीलाई ग्रेड रकम भुक्तानी दिएकोमा नेपाल सरकारको स्वीकृति लिएको देखिएन,’ प्रतिवेदनमा भनिएको छ ।

यसअघि अनलाइनखबरले यससम्बन्धि समाचार प्रकाशित गरेको थियो । यसरी पेन्सन खानेमा बहालवालादेखि पूर्वपदाधिकारीसम्म छन् ।

यो पनि पढ्नुहोस

बेतलबी बिदा जोडेर पेन्सन खान्छन् त्रिविका प्राध्यापक

त्रिविको नियममा स्थायी भएको २० वर्ष वा सोभन्दा बढी समयसम्म विश्वविद्यालय सेवामा संलग्न शिक्षक वा कर्मचारीले अवकाशप्राप्त गरेको मितिदेखि निवृत्तिभरण पाउने भनिएको छ ।

तर, २० वर्ष नै सेवा नगरेकाले समेत बेतलबी बिदालाई सेवा अवधिमा जोडेर मासिक पेन्सन खाइरहेका छन् । अनलाइनखबरले खोजी गर्दा १२६ जना प्रध्यापकले बेतलबी बिदा जोडेर पेन्सन खाएको विवरण भेटिएको थियो ।