दुई सातादेखि बैंकिङ सेक्टरमा उत्साह, यी हुन् मूल्य धेरै बढेका कम्पनी

१६ जेठ, काठमाडौं । गत साता ७७ अंक बढेको सेयर बजार यो साता जम्मा ५ अंक बढेको छ । गत साता २६८८ अंकमा रहेको बजार यो साता २६९३ अंकमा बन्द भयो ।

अन्तिम कारोबार दिन बिहीबार गणतन्त्र दिवसका कारण सार्वजनिक विदा भएपछि यो साता ४ दिन मात्रै कारोबार भयो । पहिलो दिन आइतबार ८.५७ अंक घटेको बजार सोमबार ५.२१ घट्यो । मंगलबार ०.८५ र बुधबार १७.४४ अंक बढ्यो ।

कारोबार रकम अझै बढ्न सकेको छैन । आइतबार ७ अर्ब ६० करोडको कारोबार भएकोमा सोमबार ७ अर्ब ५८ करोड, मंगलबार ६ अर्ब ५२ करोड तथा बुधबार ८ अर्ब ५८ करोडको कारोबार भयो ।

दुई सातादेखि नै बजारलाई बैंकिङ सेक्टरले डोहोर्‍याइरहेको छ । गत साता ७.२२ प्रतिशत बढेको बैंकिङ यो साता १.७९ प्रतिशत बढ्यो ।

यो सेक्टरमा उत्साह देखिएसँगै बजार बढ्नका लागि बलियो आधार बनेको छ । बैंकिङ बजारको सबैभन्दा शक्तिशाली सेक्टर हो । अर्कोतर्फ धेरै बैंकको मूल्य ‘अन्डरभ्यालुड’ मा रहेकाले लगानीकर्ताको आकर्षण देखिएको छ । फाइनान्स सेक्टर यो साता सबैभन्दा धेरै घट्यो ।

कस्तो रहला आगामी साताको बजार ?

नेपाल राष्ट्र बैंकले यो सातादेखि सबै किसिमका सेयर धितो कर्जाको जोखिमभार १०० प्रतिशत कायम गरेको छ । यसले समग्र बजारलाई सकारात्मक प्रभाव पार्दै लैजाने अनुमान छ।

बिहीबार घोषित बजेट पनि पूँजी बजार अनुकूल छ । पूँजीगत लाभकर सम्बन्धमा लगानीकर्ताको त्रास पनि बजेटमार्फत हटेको छ । पूँजीगत लाभकर पूरानै दर कायम रहने भएसँगै बजारको माहोल थप सकारात्मक बन्ने अनुमान छ ।

बजेटमा घोषणा गरिएका गैरआवासीय नेपालीलाई कारोबारका लागि सहज व्यवस्था गरिने, सरकारी ऋणपत्र बजारमार्फत कारोबार गराउन पहल गर्ने विषय पनि सकारात्मक छ ।

नेप्सेको पुनर्संरचना गर्ने, धितोपत्र बोर्डलाई सुदृढीकरण गर्ने जस्ता विषय पनि सकारात्मक छन् । तर यी पहिलेदेखि नै कार्यान्वयन हुन नसकेका विषय हुन् । अधिक तरलता, न्यून ब्याजदर जस्ता पक्षले पनि सपोर्ट गरेका कारण आगामी साता बजार बजार बढ्ने आधार बलियो बनेका छन् ।