राष्ट्रपति ट्रम्पसमक्ष राजदूत रेग्मीले पेस गरे ओहोदाको प्रमाणपत्र

News Summary

Generated by OK AI. Editorially reviewed.

नेपालका राजदूत लोकदर्शन रेग्मीले ह्वाइट हाउसमा राष्ट्रपति ट्रम्पलाई आफ्नो ओहोदाको प्रमाणपत्र पेस गरे।
उहाँले नेपाल र अमेरिकाबीच सम्बन्ध निरन्तर वृद्धि हुने विश्वास व्यक्त गर्नुभयो।
राष्ट्रपति ट्रम्पले नयाँ दायित्व बहन गर्न राजदूतलाई बधाई दिए र सहकार्यको प्रतिबद्धता व्यक्त गरे।

२९ जेठ, वाशिङ्गटन डिसी (अमेरिका) । अमेरिकाका लागि नेपालका राजदूत लोकदर्शन रेग्मीले अमेरिकी राष्ट्रपति डोनाल्ड ट्रम्पसमक्ष आफ्नो ओहोदाको प्रमाणपत्र पेस गरेका छन् ।

बुधबार राष्ट्रपतिको कार्यालय ह्वाइट हाउसमा आयोजित एक समारोहमा राजदूत रेग्मीले ओहोदाको प्रमाणपत्र पेस गरेको नेपाली नियोगले जनाएको छ ।

कार्यक्रममा राजदूत रेग्मीले नेपालका राष्ट्रपति, प्रधानमन्त्री र नेपाली नागरिकका तर्फबाट राष्ट्रपति ट्रम्पको सुस्वास्थ्य, खुसी र सफल कार्यकालको कामना गरेका थिए । राजदूत रेग्मीले नेपाल र अमेरिकाबीचको द्विपक्षीय र पारस्परिक सम्बन्ध निरन्तर वृद्धि र मजबुत हुने विश्वास व्यक्त गरे ।

उनले अमेरिकाले सामाजिक, आर्थिकलगायत नेपालका विकास प्राथमितामा पुर्‍याउँदै आएको सहयोगका लागि आभारसमेत व्यक्त गरे ।

राष्ट्रपति ट्रम्पले राजदूत रेग्मीलाई अमेरिकामा स्वागत गर्दै नयाँ दायित्व बहन गरेकोमा बधाई ज्ञापन गरे । उनले अमेरिकी सरकार दुई देशबीच सामूहिक चासोका साथ सहकार्यमार्फत सुमधुर र पारस्परिक सम्बन्ध थप मजबुत बनाउन प्रतिबद्ध रहेको बताएका थिए ।