अञ्जली अधिकारी अब फिल्म अभिनयमा, ‘आहुति २’मा देखिने

News Summary

Generated by OK AI. Editorially reviewed.

म्युजिक भिडियोकी चर्चित मोडल अञ्जली अधिकारीले फिल्म ‘आहुती’को दोस्रो भागमा डेब्यु गर्ने भएकी छन्।
चलचित्र विकास बोर्डले यसलाई निर्माण इजाजत दिएको छ र अञ्जलीको नाम पनि इजाजतपत्रमा उल्लेख छ।
अञ्जलीसँगै विष्णु सापकोटाले पनि दोस्रो भागमा अभिनय गर्नेछन्, र यसअघिका कलाकारहरू निरन्तरता पाउनेछन्।

काठमाडौं । म्युजिक भिडियोकी चर्चित मोडल अञ्जली अधिकारीले फिल्ममा डेब्यु गर्ने भएकी छन् । भवानी संग्रौलाले निर्माण गर्न लागेको फिल्म ‘आहुती’को दोस्रो श्रृंखलामा उनलाई देख्न पाइने भएको हो ।

गतसाता चलचित्र विकास बोर्डले यो फिल्मलाई निर्माण इजाजत दिएको छ । इजाजतपत्रमा अन्जलीको नाम पनि उल्लेख छ । ‘आहुती’को पहिलो भागको छायांकन जेठमा पूर्वी नेपालको पाँचथरमा सम्पन्न भैसकेको छ ।

दोस्रो भागमा अन्जलीसँगै ‘हर्के हल्दार’ श्रृंखलाबाट चिनिएका कलाकार विष्णु सापकोटाले पनि अभिनय गर्दैछन् । अघिल्लो भागका कलाकार रिहान गिरी, साम्राज्ञी शाह र प्रकाश दूतराजले पनि दोस्रो श्रृंखलामा निरन्तरता पाउनेछन् ।

प्रकाश सपुतको चर्चित म्युजिक भिडियो ‘गलबन्दी’बाट अञ्जली चम्किएकी थिइन् । बोल माया, कल्ले देख्यो रजस्ता गीतको सांगीतिक भिडियोको लागि पनि उनी परिचित छिन् ।

उनले यसअघि रिलिज भएको दिनेश राउत निर्देशित फिल्म ‘प्रसाद’सहितका केही फिल्ममा एक गीतमा नृत्य गरेकी थिइन् । त्यसअघि उनी फिल्म ‘प्रेमगीत’को अडिसनमा पनि सहभागी भएकी थिइन् ।