आर्थिक र बेरुजु समस्याबारे अध्ययन गर्न त्रिविले गठन गर्‍यो उच्चस्तरीय समिति

३२ असार, काठमाडौ । त्रिभुवन विश्वविद्यालयले बेरुजु र आर्थिक समस्याबारे अध्ययन गर्न उच्चस्तरीय समिति गठन भएको छ । त्रिविका प्राध्यापक डा. भोजराज अर्यालको संयोजकत्वमा ७ सदस्यीय समिति बनाइएको हो ।

‘त्रिविमा बेरुजु र आर्थिक सम्बन्धी समस्या देखियो । दीर्घकालीन समस्याको समाधान गर्न समिति  गठन गरिएको हो,’ त्रिविका एक पदाधिकारीले जानकारी दिए ।

संयोजक अर्यालले पनि आफूलाई जिम्मेवारी लिन पदाधिकारीले भनेको अनलाइनखबरसँग भने । ‘समितिमा रहेर काम गर्न प्रस्ताव आएको छ  । राम्रो टिम बनाउन भनेको छु,’ उनले भने ।

समितिले त्रिविको इन्जिनियरिङ अध्ययन संस्थानको स्वायत्तताको विषयमा पनि समस्याको दीर्घकालीन समाधानको पनि खोजी गर्नेछ  ।

अध्ययन संस्थान २०५५ सालमा बनेको विकेन्द्रीकरणको नियम अनुसार संस्थान सञ्चालदन हुँदै आएकोमा २०८० सालमा त्रिविको बजेट वक्तव्यले अधिकार कटौती भएको छ । यसपछि अध्ययन संस्थान अन्तर्गतका ५ वटा इन्जिनियरिङ क्याम्पसका शिक्षकहरूले आन्दोलन गर्दै आएका छन् ।

पुल्चोक क्याम्पस, थापाथली क्याम्पस, पूर्वाञ्चल क्याम्पस, पश्चिमाञ्चल क्याम्पस र चितवन क्याम्पसका शिक्षकले आन्दोलन गर्दै आएका छन् । गत असार १९ देखि आन्दोलन गर्दै आएका शिक्षकहरूले २५ गतेदेखि पठनपाठन ठप्प पारेका छन ।

गठित समितिले इन्जिनियरिङ अध्ययन संस्थानको समस्याको पनि अध्ययन गर्ने जिम्मेवारी पाएको छ ।

‘२०८० को बजेट वक्तव्यमा आएको विषयको समाधान गर्न कमिटी गठन गरिएको हो,’ एक पदाधिकारीले भने।

संस्थाको आर्थिक, शैक्षिक र प्रशासनिक स्वायत्ततामाथि गरिने कुनै पनि प्रकारको हस्तक्षेप तुरुन्त खारेज गर्नुपर्ने माग इन्जिनियरिङका शिक्षकहरूको माग छ ।

यो पनि पढ्नुहोस

एक सातादेखि त्रिविका ५ इन्जिनियरिङ क्याम्पसमा पठनपाठन ठप्प