बनेपा फिल्म स्टुडियोको लागि दोस्रो चरणको ठेक्का आह्वान

News Summary

Generated by OK AI. Editorially reviewed.

बनेपामा निर्माणाधिन 'सिनेपाः' फिल्म स्टुडियोको दोस्रो चरणको ठेक्का आह्वान गरिएको छ, जसका लागि ३० दिनभित्र अनलाइन आवेदन दिन भनिएको छ।
यो स्टुडियो ४२ रोपनी क्षेत्रफलमा बन्नेछ र स्वदेशी फिल्म निर्मातालाई प्रविधियुक्त छायांकन स्थल उपलब्ध गराउनेछ।
प्रधानमन्त्री केपी शर्मा ओलीले २०८२ बैशाख ३० गते स्टुडियो निर्माणको औपचारिक घोषणा गरेका थिए।

काठमाडौं । बनेपामा निर्माणाधिन फिल्म स्टुडियोको लागि दोस्रो चरणको बोलपत्र आह्वान भएको छ । आइतबार प्रकाशित सूचनामा इच्छुक निर्माण कम्पनीलाई ३० दिनभित्र अनलाइनमार्फत ठेक्काको आवेदन दिन भनिएको छ ।

अहिले बनेपा नगरपालिका १० स्थित जनगलमा ‘सिनेपाः’ फिल्म स्टुडियो निर्माण भैरहेको छ । सो स्टुडियोको भित्री भाग निर्माणका लागि दोस्रो चरणको ठेक्का आह्वान गरिएको हो ।

बोलपत्र रकम ३६ लाख रुपैयाँ उल्लेख छ । यसअघि, २०८१ माघ २७ गते चलचित्र विकास बोर्डले पहिलो टेन्डर आह्वान गरेको थियो । बोर्डका अध्यक्ष दिनेश डीसीका अनुसार, ‘सिनेपाः’ नेपालको ठूलो इनडोर सुटिङ स्टुडियो हुनेछ ।

निजी स्तरमा केही स्टुडियो भएपनि सरकारी स्वामित्वमा यस्तो स्टुडियो पहिलोपटक बन्ने अध्यक्ष डीसीले बताए ।

४२ रोपनी क्षेत्रफलमा निर्माण हुने यस स्टुडियोले स्वदेशी फिल्म निर्मातालाई प्रविधियुक्त, गुणस्तरीय र लागतमैत्री छायांकन स्थल उपलब्ध गराउने जनाइएको छ । वर्षौंदेखि योजनास्तरमा रहेको यो परियोजना हालै निर्माण चरणमा प्रवेश गरेको हो ।

२०८२ साल बैशाख ३० गते प्रधानमन्त्री केपी शर्मा ओलीले बालुवाटारस्थितसरकारी निवासमा आयोजित विशेष कार्यक्रममा स्टुडियो निर्माण आरम्भ भएको औपचारिक घोषणा गरेका थिए ।