एनसेल बन्यो ‘भोल्टे रोमिङ’ सेवा सुरु गर्ने पहिलो नेपाली टेलिकम कम्पनी

काठमाडौं । नेपाल भ्रमणमा आउने विदेशीका साथै नेपाल बाहिर जाने आफ्ना ग्राहकका लागि ‘भ्वाइस ओभर लङ टर्म इभोलुसन’ (भोल्टे) अन्तर्राष्ट्रिय रोमिङ सेवा सुरु गर्ने एनसेल पहिलो नेपाली टेलिकम कम्पनी बनेको छ ।

यससँगै अब ग्राहकले विदेश यात्रा गर्दा पनि स्पष्ट सुनिने भ्वाइस कल र उच्च गतिको डेटा सेवा उपयोग गरी सधैं अन रहन सक्छन् ।

एनसेलले पहिलादेखि नै विभिन्न देशबाट नेपाल आउने विदेशीलाई इन्बाउन्ड भोल्टे रोमिङ सेवा दिँदै आएको छ । कम्पनीले अब आफ्नो सेवा विस्तार गर्दै सोमबारदेखि लागु हुने गरी भारत जाने ग्राहकका लागि एयरटेलसँगको साझेदारीमा आउटबाउन्ड भोल्टे रोमिङ सेवा पनि प्रदान गर्न थालेको हो ।

भोल्टे दूरसञ्चार क्षेत्रको एक नयाँ प्रविधि हो । यसले फोरजी नेटवर्क मार्फत अझ छिटो कनेक्ट हुने उच्च गुणस्तरीय आवाज सहित एचडी कल सुविधा प्रदान गर्दछ । यो सेवा थपिँदा पहिला नै उत्कृष्ट रोमिङ अफरको फाइदा लिइरहेका एनसेलका ग्राहकका लागि भारत रोमिङ अझै परिस्कृत भएको कम्पनीको भनाइ छ ।

विभिन्न उद्देश्यसाथ नेपाल भ्रमणमा आउने अन्तर्राष्ट्रिय पर्यटक समेत सबै ग्राहकलाई उत्कृष्ट डेटा र भ्वाइस सेवा अनुभव प्रदान गर्न प्रतिबद्ध रहेको एनसेलले जनाएको छ । ग्राहकलाई भारत भ्रमणका बेला गुणस्तरीय सेवा प्रदान गर्न एयरटेलसँग साझेदारी गर्न पाएकोमा कम्पनी खुसी रहेको र थप अन्तर्राष्ट्रिय मोबाइल सेवा प्रदायकसँग भोल्टे रोमिङ विस्तार गर्न परीक्षण गरिरहेको एनसेलले जनाएको छ ।

एनसेलले भारतको जियो र भोडाफोन, अमेरिकाको एटी एन्ड टी, टी मोबाइल र भरिजोन, जापानका सफ्टबैंक र एनटीटी डोकोमो, चीनको चाइना मोबाइल र चाइना युनिकम तथा क्यानडाको बेल र टेलस लगायत प्रमुख अन्तर्राष्ट्रिय मोबाइल सेवा प्रदायकसँग आउटबाउन्ड रोमिङ सेवा परीक्षण गरिरहेको छ ।

इन्बाउन्ड भोल्टे रोमिङका लागि एनसेलले एयरटेल र जियो (भारत), चाइना मोबाइल (चीन), ओरेडु (कुवेत), मोबिली (साउदी अरेब), एटी एन्ड टी (अमेरिका) र भियटेल (भियतनाम) का ग्राहकलाई भोल्टे रोमिङ सेवा दिँदै आएको छ।

एनसेलले ग्राहकलाई देश बाहिर जहाँ गए पनि उनीहरूका परिवारजन, साथीभाइ र व्यवसायसँग सधैं कनेक्टेड रहन विश्वव्यापी रोमिङ नेटवर्क विस्तार गर्दै आइरहेको जनाएको छ ।