आफ्नो र मन्त्रीहरूको सम्पति विवरण सार्वजनिक गर्न प्रधानमन्त्रीलाई आग्रह

News Summary

Generated by OK AI. Editorially reviewed.

राष्ट्रिय स्वतन्त्र पार्टीले प्रधानमन्त्री केपी शर्मा ओलीलाई आफ्नो र मन्त्रीहरूको सम्पति विवरण सार्वजनिक गर्न आग्रह गरेको छ।
रास्वपाकी सांसद डा. चन्दा कार्कीले प्रतिनिधि सभामा प्रधानमन्त्रीले सुशासनको भाषण दिनुअघि मन्त्रीहरूको सम्पति सार्वजनिक गर्नुपर्ने बताएकी छन्।
प्रधानमन्त्री ओलीले प्रतिनिधि सभामा आफ्नो विदेश भ्रमणबारे जानकारी दिँदै सरकारको प्राथमिकता सुशासन रहेको बताएका थिए।

२९ साउन, काठमाडौं । राष्ट्रिय स्वतन्त्र पार्टी (रास्वपा)ले आफ्नो र मन्त्रीहरूको सम्पति विवरण सार्वजनिक गर्न प्रधानमन्त्री केपी शर्मा ओलीलाई आग्रह गरेको छ ।

बिहीबार प्रतिनिधि सभामा आकस्मिक समयमा लिएर बोल्दै रास्वपाकी सांसद डा. चन्दा कार्कीले यस्तो आग्रह गरेकी हुन् ।

बुधबार प्रधानमन्त्री ओलीले प्रतिनिधि सभाको बैठकलाई आफ्नो विदेश भ्रमणबारे जानकारी गराएका थिए । त्यसक्रममा सरकारको कामको चर्चा गर्दै सरकारको प्राथमिकता सुशासन रहेको बताएका छन् ।

प्रधानमन्त्रीले सरकारको प्राथमिकता सुशासन रहेको बताइरहँदा स्वयमको र मन्त्रीहरूको सम्पति विवरण सार्वजनिक हुन नसकेको भनेर रास्वपाकी सांसद कार्कीले यस्तो आग्रह गरेकी हुन् ।

उनले भनेकी छन्, ‘सुशासनको भाषण दिनु अगाडि आफ्ना मन्त्रीहरूको काम, आचरण, सम्पति जाँच गर्नु र मन्त्रीहरूको सम्पति सार्वजनिक गर्नुहोस् । देशमा सुशासनको यथार्थको के अवस्था छ बुझ्नुस् ।’