पहिलो पटक अपी हिमाल आरोहणमा लाग्यो टोली, पर्यटनले गर्‍यो बिदाइ

१३ भदौ, काठमाडौं । सुदूरपश्चिम प्रदेशको दार्चुला जिल्लामा अवस्थित अपी हिमालको पहिलो पटक आरोहण गर्न १५ सदस्यीय टोली शुक्रबार त्यसतर्फ प्रस्थान गरेको छ ।

नेपाल पर्वतारोहण संघ (एनएमए) द्वारा आयोजित कार्यक्रममा संस्कृति, पर्यटन तथा नागरिक उड्डयनमन्त्री बद्री पाण्डेले आरोही टोलीलाई बिदाइ गरे ।

उनले पहिलो आरोहण सुदूरपश्चिम प्रदेशका लागि ऐतिहासिक र सुखद क्षण भएको उल्लेख गरे । नेपाल सरकारले हालै राजपत्र मार्फत सुदूरपश्चिम र कर्णाली प्रदेशका ९७ हिमाल आरोहणमा दुई वर्षका लागि शुल्क छुट दिने निर्णय गरेसँगै अपी आरोहण प्रारम्भ भएको हो ।

बिदाइ कार्यक्रममा मन्त्री पाण्डेले पर्वतारोहण क्षेत्र नेपाललाई चिनाउने महत्त्वपूर्ण साधना रहेको बताउँदै शेर्पा तथा गैरशेर्पा आरोहीको संयुक्त प्रयासले हिमाल आरोहण क्षेत्रमा नयाँ युगको सुरुवात हुने विश्वास व्यक्त गरे ।

‘यस अभियानले स्थानीयस्तरमा समन्वय र सहकार्य प्रवर्द्धन गर्नुका साथै सुदूरपश्चिम र कर्णाली प्रदेशको पर्यटन विकासमा महत्त्वपूर्ण योगदान पुर्‍याउने छ,’ मन्त्री पाण्डेले भने ।

अपी गाउँपालिकाबाट समेत संलग्न टोलीमा १५ जना आरोही सहभागी छन् । आरोहण अभियानमा जोखिम रहे पनि स्थानीयलाई समेत समेट्दै अघि बढाइएको यो पहल सुदूरपश्चिम पर्यटन र पर्वतारोहणको क्षेत्रमा नयाँ अवसरका रूपमा हेरिएको छ ।